၂၂.၁၂.၂၀၂၄
Written By Thandar
အေးမေတ္တာ ပရဟိတလူမှုကူညီရေးအသင်းရဲ့ နှစ်ပတ်လည်အခမ်းအနားနဲ့ ပရဟိတလုပ်ငန်းတွေကို စွမ်းစွမ်းတမံကူညီဆောင်ရွက်ပေးခဲ့ကြတဲ့ ပရဟိတညီအစ်ကိုတွေကို ဂုဏ်ပြုမှတ်တမ်းပေးအပ်ခြင်းအခမ်းအနားကို ယနေ့ ဒီဇင်ဘာ ၂၂ ရက် နံနက် ၁၀ နာရီက ရန်ကုန်မြို့ ဒေါပုံမြို့နယ် နွယ်အေးရပ်ကွက်ရှိ အေးမေတ္တာပရဟိတလူမှုကူညီရေးအသင်းမှာ ကျင်းပခဲ့ပါတယ်။
အဆိုပါ အခမ်းအနားမှာ ကိုထွန်းမင်း၊ TikTok Cele ပုတု၊ မော်လဝီ ယူစွဖ်တို့နဲ့ အသင်းမှာ ကြိုးစားပြီး လုပ်ကိုင်ခဲ့ကြသူအသီးသီးကို ဂုဏ်ပြုမှတ်တမ်းတွေ ပေးအပ်ခဲ့ကြပါတယ်။
“ကျွန်တော်တို့ကို အခုလို ဂုဏ်ပြုမှတ်တမ်းပေးအပ်လိုက်တယ်ဆိုတာက တကယ့်ကို အားဆေးတစ်ခွက်သောက်လိုက်ရသလို ခံစားရပါတယ်။ ခွန်အားတွေလည်း အများကြီးကို ဖြစ်ရပါတယ်။ ပိုပြီး အားတွေရှိလာတယ်။ တစ်ရက်တစ်ရက်ကို လှူရမယ့်နေရာတွေ ဘယ်လောက်ပဲများများ အားအင်တွေရှိပြီးသားဖြစ်တဲ့အတွက်ကို အများကြီးလှူလို့ရပြီ။ နေရာအစုံသွားလို့ရပြီမို့ ဒီအေးမေတ္တာပရဟိတအသင်းကိုလည်း ကျေးဇူးအများကြီး တင်ပါတယ်”လို့ ပရဟိတ ကိုထွန်းမင်းကပြောပါတယ်။
အေးမေတ္တာပရဟိတ လူမှုကူညီရေးအသင်းကတော့ လွန်ခဲ့တဲ့ ၄ နှစ်ကတည်းက တည်ထောင်ထားပြီး ပရဟိတသမားတွေကို ဂုဏ်ပြုမှတ်တမ်း ပေးအပ်ခဲ့တာလည်းဖြစ်တယ်လို့ သိရပါတယ်။ ဒီအသင်းက သာရေး နာရေး လူမှုကူညီရေးတွေကို ဆောင်ရွက်ပေးလျှက်ရှိတာလည်းဖြစ်ပါတယ်။
