၂၁.၁၂.၂၀၂၄
Written By Thandar
“ကံကံ၏ အကျိုးပေး” ဇာတ်ကားနဲ့ “သုံးယောက်ပေါင်းလောင်းကျော်” ဇာတ်ကားတွေ မိတ်ဆက်ကန်တော့ပေးပွဲအခမ်းအနားကို ယနေ့ ဒီဇင်ဘာ ၂၁ ရက် နံနက်ပိုင်းက ရန်ကုန်မြို့၊ သင်္ဃန်းကျွန်းမြို့နယ်ရှိ ကျိုက္ကဆံဘုရားမှာ ကျင်းပခဲ့ပါတယ်။
“ကျွန်တော်တို့ နှစ်ယောက်ရဲ့ Channel တွေမှာ ပြသမှာမို့ ပြသမယ့် ပွဲဦးထွက်ဇာတ်ကားလေးရိုက်ဖို့အတွက် ကန်တော့ပွဲပေးကြတာပါ။ ဒီကားတွေကတော့ ဇာတ်လမ်းအတိုတွေပါ။ ကျွန်တော်အနုပညာ အလုပ်လုပ်တာ နှစ်ပေါင်း ၂၀ ကျော်လောက်ရှိပေမယ့် လူတိုင်းမသိတဲ့ အနေအထားတစ်ခုမို့ ကိုယ်ပိုင်ထုတ်လုပ်ရေး လုပ်ဖြစ်တာပါ။ မသာသာတို့ကတော့ လူသိများတယ်။ နေရာတစ်ခုမှာ ရှိနေတာလည်းဖြစ်တယ်လေ။ ကိုယ်တိုင်ရိုက်ကူးမှပဲ ရမယ့်အနေအထားမို့ပါ။ ခုကတော့ ဒီလမ်းကြောင်းပေါ်ကနေ အနုပညာပိုးက မသေနိုင်တာမို့ ပြန်လည် ဇွဲမလျှော့ဘဲလုပ်ဖြစ်သွားတာပါ ”လို့ သရုပ်ဆောင် နေမင်းသွင်က ပြောပါတယ်။
ဒီဇာတ်ကားတွေရဲ့ ဇာတ်လမ်းနဲ့ ဇာတ်ညွှန်းပိုင်းကို သာသာက ရေးသားထားပြီးတော့ ဒါရိုက်တာ ကျော်ဇောလင်းက သရုပ်ဆောင်တွေဖြစ်ကြတဲ့ နေမင်းသွင်၊ မေတ္တာမြင့်မြတ်ဟိန်း၊ သာသာ၊ သျှားစု၊ ဦးဥဩ၊ မာယာ၊ ဘူးသီး၊ ထွန်းထွန်း၊ ဖြူဖွေး၊ နွေးရစ်သဥ္ဇူစိုး၊ နန်းဖြူနှင်းသူ စတဲ့ သရုပ်ဆောင်တွေ ပါဝင်ထားကြပါတယ်။
“သာတို့ရဲ့ ကံကံ၏အကျိုးပေးဆိုတဲ့အတိုင်း မကောင်းတာလုပ်ရင်တော့ မကောင်းတာတွေခံရမယ်ပေါ့နော်။ လူတစ်ယောက်က တူသောအကျိုးကတော့ ဘယ်အချိန်မဆို ကိုယ့်ဆီပြန်လာနိုင်တာတွေကို ရိုက်ပြထားပါတယ်။ သုံးယောက်ပေါင်းလောင်းကျော်ကတော့ ဟာသဆန်ဆန် ဇာတ်လမ်းလေးပါ။ ပရိသတ်တွေအမြင် တစ်မျိုးဆန်းစေမှာပါ”လို့ သရုပ်ဆောင် သာသာက ပြောပါတယ်။
“ကံကံ၏ အကျိုးပေး” နဲ့ “သုံးယောက်ပေါင်းလောင်းကျော်” ဇာတ်ကားတွေကိုတော့ Nay Min Thwin Artist YouTube Channel နဲ့ Thur Thur Entertainment YouTube Channel တွေမှာ ထုတ်လွှင့်ပြသသွားမှာလည်း ဖြစ်ပါတယ်။
