၁၉.၁၂.၂၀၂၄
Written By Thandar
အောင်စေရုပ်ရှင်ထုတ်လုပ်ရေးက အချစ်ဒရာမဇာတ်လမ်းပုံစံ “တယုတယ …ခြွေ” ရုပ်ရှင်ဇာတ်ကားကြီး Red Carpet Show ကို ဒီဇင်ဘာ ၁၈ ရက် ညနေပိုင်းက ရန်ကုန်မြို့ သမ္မတအဆင့်မြင့်ရုပ်ရှင်ရုံမှာ ကျင်းပခဲ့ပါတယ်။
“ဒီဇာတ်ကားက စူတို့က လွန်ခဲ့တဲ့ ၈ လကျော်လောက်က ရိုက်ထားတဲ့ ကားပါ။ စူရဲ့ ကာရိုက်တာက စိတ်နေစိတ်ထားမျိုးစုံပြောင်းလဲရတဲ့ မိန်းကလေးတစ်ယောက်ပေါ့နော်။ ကိုညီနန္ဒနဲ့က စူရဲ့ ကာရိုက်တာကတစ်မျိုးပေါ့။ နောက်ကိုရွှေထူးနဲ့ တွေ့ချိန်မှာ စိတ်ထားက တစ်မျိုးဆိုတော့လေ။ သူတို့ နှစ်ဦးနဲ့ဆုံချိန်က စိတ်နေစိတ်ထားတွေက မတူဘူးပေါ့နော်။ ခပ်မိုက်မိုက် လူဆိုးလူမိုက် အထာလေး ကိုရွှေထူးကို တွေ့ရမှာပါ။ ကိုရွှေထူးနဲ့ စူက ရှေ့ကားမှာလည်း ဆုံဖူးပါတယ်။ ဒီကားရိုက်ချိန်မှာ အမှတ်တရတွေအများကြီးပါပဲ ရှိခဲ့ပါတယ်” လို့ သရုပ်ဆောင် အိချောပိုက ပြောပါတယ်။
ဒီဇာတ်ကားကို ဝတ္ထုနဲ့ဇာတ်ညွှန်း ဒီဒီထက်အောင်ကရေးသားထားပြီးတော့ ဒါရိုက်တာ စိုးမိုးမင်းက ရိုက်ကူးပြီး အကယ်ဒမီရွှေထူး၊ အိချောပို၊ ညီနန္ဒ၊ ခိုင်နှင်းဝေ၊ ရွှေပိုးအိမ်၊ မင်းအာကာ၊ အထူးဧည့်သည် သရုပ်ဆောင် အကယ်ဒမီ မေသန်းနု စတဲ့ သရုပ်ဆောင်များစွာ ပါဝင်ထားကြပါတယ်။
“တယုတယ…ခြွေ” ရုပ်ရှင်ဇာတ်ကားကြီးကို မနက်ဖြန် ဒီဇင်ဘာ ၂၀ ရက်ကစ မြန်မာတစ်ပြည်လုံးရှိ ရုပ်ရှင်ရုံတွေမှာ ရုံတင်ပြသမှာလည်းဖြစ်ပါတယ်။
