၁၇.၁၂.၂၀၂၄
Written By Thandar
လေးပွင့်ဆိုင်အချစ်ဇာတ်လမ်းပုံစံ“ဆန်းကြယ်သော ဖူးစာ” Season 2 ဇာတ်ကားကန်တော့ပွဲပေးမှု အခမ်းအနားကို ယနေ့ ဒီဇင်ဘာ ၁၇ ရက် နံနက် ၉ နာရီက ရန်ကုန်မြို့ ကျိုက္ကဆံဘုရားအောင်မြေမှာ ကျင်းပခဲ့ပါတယ်။
“ဆန်းကြယ်သော ဖူးစာရဲ့ Season 1 မှာက အိမ်ထောင်ရေးဇာတ်လေး အောင်မြင်လို့ ခုဇာတ်လမ်းကို ထပ်မံရိုက်ကူးဖြစ်တာပါ။ မေရဲ့ အမျိုးသားက ကိုယ့်ရဲ့ သူငယ်ချင်းနဲ့ ဖောက်ပြန်တယ်ပေါ့နော်။ ဖောက်ပြန်ခံရတဲ့ အမျိုးသမီးလေးတစ်ယောက်ရဲ့ အဆက်ကိုရိုက်မှာပါ။ ဒီအကြောင်းလေးလည်းပါတယ်။ ပရိသတ်တွေလည်း ဖောက်ပြန်တာတွေပဲ ထပ်နေမှာစိုးလို့ ဇာတ်လမ်းအလှည့်အပြောင်းလေးတွေနဲ့ ဇာတ်အနိမ့်အမြင့်လေးတွေပါပါမယ်။ ဇာတ်က ပုံမှန်ထက်ပိုကောင်းတဲ့ ဆန်းကြယ်တဲ့အကြောင်းအရာလေး ထပ်ထည့်ထားတယ်လို့ သိရပါတယ်။ ခေတ်တွေသာပြောင်းသွားပေမယ့် ယောက်ျားတွေရဲ့ ဖောက်ပြန်မှုတွေက ပြောင်းမသွားဘူးပေါ့နော်။ ပရိသတ်တွေ အကြိုက်တွေ့စေမှာပါ”လို့ သရုပ်ဆောင် မေသူထွန်းက ပြောပါတယ်။
Verden Production က ဇာတ်လမ်းနဲ့ ဇာတ်ညွှန်းပိုင်းကို မေသူထွန်းက ရေးသားထားပြီးတော့ ဒါရိုက်တာ မင်းစနေက လာမယ့် ဇန်နဝါရီလဆန်းပိုင်းမှာ ရန်ကုန်မြို့နဲ့ မန္တလေးမြို့တွေမှာ အိမ်ထောင်ရေးဇာတ်လမ်းပုံစံ ရိုက်ကူးပုံဖော်သွားမယ်လို့ သိရပါတယ်။
သရုပ်ဆောင်တွေဖြစ်တဲ့ နေ့သစ်အေးအောင်၊ နေရှိုင်း၊ မေသူထွန်း၊ ချောဆင့်သူ ၊ သီဟဟိန်း၊ ဘုန်းနေ ခေတ် ၊ ဝသုန်၊ ခင်ကျော့ရှင်း၊ ဝင်းမြတ်ဖြိုး စတဲ့ အနုပညာရှင်များစွာ ပါဝင်ထားကြပါတယ်။
