၁၅.၁၂.၂၀၂၄
Written By Zun
ထိုင်းနိုင်ငံတောင်ပိုင်း စူရတ်ဌာနီခရိုင် ကော့စမွီကျွန်းတွင် မိုးဆက်တိုက်ရွာသွန်းပြီး မြေပြိုမှုဖြစ်ပွားခဲ့သောကြောင့် မြန်မာ အလုပ်သမားနှစ်ဦး သေဆုံးခဲ့ကြောင်း ထိုင်းသတင်းဌာနများအရ သိရသည်။
ယနေ့ ဒီဇင်ဘာလ ၁၅ ရက် နံနက် ၆ နာရီအချိန်ခန့်က ကော့စမွီကျွန်းတွင် မိုးအဆက်မပြတ်ရွာသွန်းခဲ့ရာ မြေသားများ ပျော့အိကျလာကာ တောင်နရံများ ပြိုကျ၍ လူနေအိမ်အဆောက်အဦများပေါ် ပိမိခဲ့ခြင်း ဖြစ်ကြောင်း သိရသည်။
မြေပြိုကျမှုကြောင့် မြန်မာအလုပ်သမား ၂ ဦး မြေအောက်တွင် ပိမိပျောက်ဆုံးနေခဲ့သောကြောင့် ဒေသအာဏာပိုင်များနှင့် လူမှုကယ်ဆယ်ရေးအဖွဲ့များဖြစ်ကြသည့် Koh Samui ပရဟိတဖောင်ဒေးရှင်း ၊ Wat Plai Laem ကယ်ဆယ်ရေးဖောင်ဒေးရှင်း၊ Koh Samui ကယ်ဆယ်ရေးစင်တာ တို့က ရှာဖွေခဲ့ရာ ယနေ့ ညနေ ၃ နာရီခွဲခန့်က သေဆုံးလျက် တွေ့ရှိခဲ့ကြောင်း သိရသည်။
သေဆုံးသူ ၂ ဦးမှာ အသက် ၂၇ နှစ်နှင့် ၃၇ နှစ်အရွယ် မြန်မာနိုင်ငံသား အမျိုးသားများဖြစ်ပြီး လမိုင်းဒေသ ဟီမ ထွန်းလမ်းရှိ အလုပ်သမားအဆောင်ဘက်တွင် နေထိုင်သူများ ဖြစ်ကြောင်း သိရသည်။
ယခုအခါ ကော့စမွီရဲတပ်ဖွဲ့က စုံစမ်းစစ်ဆေးမှုများပြုလုပ်နေကာ အခင်းဖြစ်ပွားခဲ့သည့်နေရာအနီးတဝိုက်တွင် အဆောက်အဦများ ထပ်မံ တည်ဆောက်ခြင်း မပြုလုပ်ကြရန် တားမြစ်ထားကြောင်း သိရသည်။
အဆိုပါဒေသတွင် မိုးသည်းထန်စွာရွာသွန်းမှုကြောင့် မြေပြိုမှုများ ဖြစ်ပေါ်နိုင်ကြောင်း ထိုင်းနိုင်ငံ သတ္တုသယံဇာတဦးစီးဌာန က ယမန်နေ့ ဒီဇင်ဘာ ၁၄ ရက်တွင် သတင်းထုတ်ပြန်ထားခဲ့ကြောင်း သိရသည်။
Sources-Khaosod English,Thai PBS, Daily News ,today
