ယူကရိန်း၏ ဒုံးကျည်ကြောင့် ရုရှားစစ်သား ၈၉ ဦး ကျဆုံးခဲ့မှုအတွက် ရုရှားက ဒုံးကျည်ဖြင့်တန်ပြန်တိုက်ခိုက်ရာ ယူကရိန်းစစ်သား ၆၀၀ ကျော်ကျဆုံးဟု ကြေညာ

၉. ၁. ၂၀၂၃
translated by Htwe Ko Tun

ရုရှားအစိုးရ၊ ကာကွယ်ရေးဝန်ကြီးဌာနက ယူကရိန်းတပ်ဖွဲ့များ ယာယီစခန်းချနေသည့် ယူကရိန်းအရှေ့ပိုင်းရှိ အိမ်ရာတစ်ခုအတွင်းမှ အဆောက်အအုံနှစ်ခုကို အင်အားပြင်းထန်သောဒုံးကျည်ဖြင့် ပစ်ခတ်တိုက်ခိုက်နိုင်ခဲ့၍ ယူကရိန်းစစ်သား ၆၀၀ ကျော် ကျဆုံးခဲ့ကြောင်း ဇန်နဝါရီ ၈ ရက်တွင် ကြေညာခဲ့သည်။

ကြေညာချက်နှင့်ပတ်သက်၍ ယူကရိန်းဘက်မှတစ်စုံတစ်ရာ တုံပြန်ပြောကြားမှုမရှိသေးပေ။ သို့သော် ထိုသို့တိုက်ခိုက်ခံရသော ယူကရိန်းအရှေ့ပိုင်းရှိ ကရာမာတော့စ်ခ်မြို၏ မြိုတော်ဝန်ကမူ မြို၏အဆောက်အအုံများကို တိုက်ခိုက်မှုများရှိခဲ့ကြောင်း၊ သိုသော် ထိခိုက်သေဆုံးသူမရှိကြောင်း ၎င်း၏ လူမှုကွန်ရက်စာမျက်နှာတွင် ဇန်နဝါရီလ ၈ ရက် နံနက်ပိုင်းက ရေးသားခဲ့သည်။

ရုရှားကာကွယ်ရေးဝန်ကြီးဌာနကမူ ကရာမာတော့စ်ခ်မြို့၏ အဆောက်အအုံများကို တိုက်ခိုက်ခဲ့ခြင်းက ဇန်နဝါရီ ၁ ရက်၌ ဒွန်တက်ခ်ပြည်နယ်၊ မာကီရက်ဗိကာမြို့တွင် ရုရှားစစ်တန်းလျားများကို ယူကရိန်းဘက်မှ ပစ်ခတ်သောဒုံးကျည်များကြောင့် အနည်းဆုံးရုရှားတပ်ဖွဲ့ဝင် ၈၉ ဦးအထိ ကျဆုံးခဲ့ရခြင်းအတွက် လက်စားချေခြင်းဖြစ်ကြောင်း ကြေညာချက်တွင် ဖေါ်ပြခဲ့သည်။

ရုရှား၏ကြေညာချက်တွင် ပစ်ခတ်မှုအတွက် ယုံကြည်စိတ်ချရသော ထောက်လှမ်းရေးသတင်းများကို အသုံးချခဲ့ကြောင်း၊ ကရာမာတော့စ်ခ်မြို့ရှိ တိုက်ခိုက်မှုပြုခဲ့သော အဆောင်တစ်ခုတွင် ယူကရိန်းစစ်သား ၇၀၀ ကျော်နေထိုင်၍ နောက်အဆောင်တစ်ခုတွင် ၆၀၀ ကျော်နေထိုင်ကြောင်း ပြောခဲ့သည်။
Ref—–NDTV