၁၄.၁၂.၂၀၂၄
Written By Thandar
လေးပွင့်ဆိုင် အချစ်ဇာတ်လမ်းပုံစံ “သူငယ်ချင်း မိထွေး” ဇာတ်လမ်းတွဲသစ် မိတ်ဆက်ပွဲ အခမ်းအနားကို ယနေ့ ဒီဇင်ဘာ ၁၄ ရက် နေ့လယ်ပိုင်းက ရန်ကုန်မြို့ Myanmar Plaza Promotion Area မှာ ကျင်းပခဲ့ပါတယ်။
“ဒီဇာတ်ကားက ဝါဆိုရဲ့ ပထမဦးဆုံး စီးရီးပါ။ ဝါဆိုက မေပယ့်လ် ဆိုတဲ့ ဇာတ်ကောင်နေရာက ပါဝင် သရုပ် ဆောင်ထားပါတယ်။ ကျောင်းနေဘက် မာနကြီးတဲ့ အမျိုးသမီးနှစ်ယောက်ကြားက ငြိုးမာန်ဖွဲ့ကလဲ့စားတွေလည်း ပါပါတယ်။ ဒီအငြိုးတွေ အားပြိုင်တဲ့အခါ ဖြစ်ပေါ်လာမယ့် အိမ်ထောင်ရေးရှုပ်ထွေးမှုတွေ ချစ်ခြင်း၊ ဝန်တိုခြင်း အငြှိုးအာဃာတတွေ ပါဝင်တဲ့ဇာတ်လေးပါ။ ဇာတ်ကားလေးက ပရိသတ်မထင်မှတ်ထားလောက်တဲ့ အလှည့်အပြောင်းလေးတွေပါပါတယ်။ဇာတ်ကားထုတ်လွှင့်ချိန်မှာလည်း အားပေးကြပါလို့ ”လို့ သရုပ်ဆောင် ဝါဆိုမိုးဦးက ပြောပါတယ်။
ဒီဇာတ်ကား မိတ်ဆက်ပွဲကြီးမှာ ဇာတ်လမ်းတွဲမှာ ပါဝင်ထားကြတဲ့ အနုပညာရှင်တွေဖြစ်ကြတဲ့ ဒါရိုက်တာ နိုရာကို၊ နေထွဋ် ၊ ဝါဆိုမိုးဦး ၊ နော်ဖောအယ်ထားတို့လည်း တက်ရောက်ခဲ့ပြီး ပရိသတ်တွေနဲ့အတူ ဂိမ်းတွေဆော့ကစားကာ လက်ဆောင်တွေလည်း ပေးအပ်ခဲ့ကြပါတယ်။
Bonanza Production ထုတ်လုပ်ရေးက ဇာတ်ကားကို ဇာတ်လမ်း ဝါဆိုမိုးဦး၊ ဇာတ်ညွှန်း ဖြိုးသဥ္ဇာကျော် (ဇာတ်ညွှန်းစတူဒီယို) က ရေးသားပြီးတော့ ဒါရိုက်တာ နိုရာကိုက သရုပ်ဆောင်တွေဖြစ်တဲ့ ရဲအောင်၊ တိုင်ရွန်၊ နေထွဋ်၊ ဝါဆိုမိုးဦး၊ နော်ဖောအယ်ထား စတဲ့သူတွေပါဝင်ထားကြပါတယ်။
အပိုင်း ၁၆ ပိုင်းပါဝင်တဲ့ “သူငယ်ချင်းမိထွေး” ဇာတ်လမ်းတွဲကို လာမယ့် ဒီဇင်ဘာ ၂၁ ရက် ည ၇ နာရီတိုင်းမှာ စနေနေ့နဲ့ တနင်္ဂနွေနေ့အပတ်စဉ် M Entertainment Channel က ထုတ်လွှင့်ပြသမှာလည်းဖြစ်ပါတယ်။
