၁၂.၁၂.၂၀၂၄
Written By Thandar
စိန်ဌေးရုပ်ရှင်ထုတ်လုပ်ရေးက ဇာတ်လမ်းနဲ့ဒါရိုက်တာ မင်းဆက်ရိုက်ကူးမယ့် ရိုမန့်ဒရာမာဇာတ်လမ်းပုံစံ “မေမေ့ အချစ်ဦး” ရုပ်ရှင်ဇာတ်ကားကြီး စာနယ်ဇင်းမိတ်ဆက်ပွဲနဲ့ ကန်တော့ပွဲပေးခြင်းအခမ်းအနားကို ယနေ့ ဒီဇင်ဘာ ၁၂ ရက် နံနက် ၉ နာရီက ရန်ကုန်မြို့ရှိ Sedona Hotel မှာ ကျင်းပခဲ့ပါတယ်။
“မေမေ့အချစ်ဦးက ကျွန်တော့်ရဲ့ ဒုတိယမြောက်ရုပ် ရှင်ဇာတ်ကားကြီးပါ။ သဘင်သည် မြနှင်းဆီ ရိုက်ကူးတုန်းက ပရိသတ်တွေ ကြိုက်ကြပေမဲ့ သဘင်သည်မြနှင်းဆီက ကျွန်တော်ရိုက်ချင်တဲ့ ပုံစံမဟုတ်ဘူး။ ဒီကားလေးက ကျွန်တော်ကြိုက်တဲ့ပုံစံ၊ ကျွန်တော်ကြိုက်တဲ့ ရိုမန့်ဒရာမာ ပုံစံမျိုးပါ။ အားလုံးကလည်း ကျွန်တော့်ကို ယုံကြည်လို့ဆိုပြီး ရိုက်ကူးကြတာပါ။ ယုံကြည်ကြတဲ့သူတွေ တစ်ယောက်ချင်းစီကိုလည်း ကျေးဇူးအများကြီးတင်ပါတယ်”လို့ ဒါရိုက်တာ မင်းဆက်က ပြောပါတယ်။
အဆိုပါ အခမ်းအနားကို မြန်မာနိုင်ငံ ရုပ်ရှင်အစည်းအရုံး ဥက္ကဋ္ဌ ဦးကြည်စိုးထွန်း၊ အကယ်ဒမီ မောင်မျိုးမင်း (ရင်တွင်းဖြစ်)တို့က မုဒိတာစကား ပြောကြားပါတယ်။ အဲဒီနောက် စိန်ဌေးရုပ်ရှင်ထုတ်လုပ်ရေးပိုင်ရှင် ဦးဝင်းကြည်က အမှတ်တရစကားပြောကြားခဲ့ပြီး “မေမေ့ အချစ်ဦး” ရုပ်ရှင်ဇာတ်ကားမှာ ပါဝင်ထားတဲ့ သရုပ်ဆောင်တွေက မိမိရိုက်ကူးမယ့်ဇာတ်ကောင်တွေကို မိတ်ဆက်ပေးကြပါတယ်။
“ သဲသဲကို ယုံယုံကြည်ကြည် လက်တွဲခေါ်ပေးတဲ့အတွက်လည်း ဒါရိုက်တာကိုဆက်ကို ကျေးဇူးတင်ပါတယ်။ ဒီကားလေးက သဲသဲရဲ့ ပထမဆုံး ရုံတင်ကားကြီးလည်း ဖြစ်တယ်။ ဒီကားထဲမှာ ပါဝင်မယ့် သရုပ်ဆောင် ကိုကိုတွေ၊ မမတွေ အားလုံးကလည်း လက်တွဲကူညီပေးကြသလို သဲသဲလည်း ပိုပြီး ကြိုးစားသွားမှာပါ”လို့ သရုပ်ဆောင် သဲစုညိမ်းက ပြောပါတယ်။
“မေမေ့ အချစ်ဦး” ရုပ်ရှင်ဇာတ်ကားကို ဇာတ်လမ်း ကိုဆက်၊ ဇာတ်ညွှန်း အင်ကြင်းဟန်က ရေးသားပြီးတော့ ဒါရိုက်တာ မင်းဆက်က ရိုက်ကူးပြီး သရုပ်ဆောင်တွေဖြစ်တဲ့ ဟင်နရီစံ၊ မေမီကိုကို၊ သဲစုညိမ်း၊ ရွှန်းလဲ့ကိုကို၊ သံစဉ်ဖြိုးပိုင်တို့က ပါဝင်သရုပ်ဆောင်ကြမှာဖြစ်ပါတယ်။
သဘင်သည်မြနှင်းဆီ ရုပ်ရှင်ဇာတ်ကားကို ရိုက်ကူးထားတဲ့ ဒါရိုက်တာမင်းဆက်ရဲ့ ဒုတိယမြောက် ရုပ်ရှင်ဇာတ်ကားကြီးဖြစ်တဲ့ မေမေ့အချစ်ဦး ရုပ်ရှင်ဇာတ်ကားက မေတ္တာတရားများကြားက အားပြိုင်မှုများကို မြင်တွေ့ရမှာလည်းဖြစ်ပါတယ်။
