၁၀. ၁၂. ၂၀၂၄
Written by Nay Moe
ကိုးကန့်တရုတ်လက်နက်ကိုင် MNDAA နယ်မြေလုယက်သိမ်းယူထားတဲ့ ကွမ်းလုံနဲ့ သိန္နီလမ်းကြောပေါ်က နားတီးဂိတ်မှာ လက်နက်ခဲယမ်း သယ်ဆောင်လာတဲ့ MNDAA တပ်ကား မီးလောင်ပေါက်ကွဲခဲ့ပြီး လူ ၅ ဦးသေဆုံးကာ ၁ ဦး ပြင်းထန်ဒဏ်ရာရရှိခဲ့တယ်လို့ ဒေသတွင်းက UWSA ထိန်းချုပ်မီဒီယာ Wa News Land မှာ ဖော်ပြထားပါတယ်။
ဒီဖြစ်စဥ်က ပြီးခဲ့တဲ့ ဒီဇင်ဘာ ၈ ရက်၊ နေ့လယ် ၁၂ နာရီ ၂၆ မိနစ်ဝန်းကျင်က မီးလောင်ပေါက်ကွဲခဲ့တာဖြစ်ပြီး ကားပေါ်ပါလာတဲ့ MNDAA လက်နက်ကိုင် ၃ ဦးအပြင် ဂိတ်အနီးနားမှာရှိတဲ့ အရပ်သား ၂ ဦးလည်း သေဆုံးခဲ့တယ်လို့ သိရပါတယ်။
ကားပေါ်မှာ ကျည်တွေ လက်နက်ကြီးတွေပါလာသလို ပေါက်ကွဲမှုကလည်း သုံးကြိမ်တောင်ဖြစ်ခဲ့ပြီး ယာဥ်ကလည်း ဆိုးဆိုးရွားရွား တစ်စစီပျက်စီးသွားသလို သေဆုံးသူတွေကလည်း အပိုင်းပိုင်းအစစ ဖြစ်ကုန်တာကြောင့် ဖြစ်စဥ်ဖြစ်အပြီး ယာဥ်သွားလာခွင့်ရပ်ဆိုင်းလိုက်လို့ ယာဥ်ကြောပိတ်ဆို့မှုတွေပါဖြစ်ပွားခဲ့တယ်လို့ သိရပါတယ်။
Ref & Photo – Wa News Land
