၇.၁၂.၂၀၂၄
Written By Thandar

Global Star Entertainment က ကြီးမှူးကျင်းပတဲ့ Mister & Miss Christmas Star 2024 ပြိုင်ပွဲက Top ၁၉ စာရင်းဝင် အလှမောင်မယ်တွေ စာနယ်ဇင်းမိတ်ဆက်ပွဲကို ဒီဇင်ဘာ ၆ ရက် နေ့လယ်ပိုင်းက ရန်ကုန်မြို့ Chatrium Hotel မှာ ကျင်းပခဲ့ပါတယ်။

ဒီပြိုင်ပွဲကြီးရဲ့ နောက်ဆုံး Grand Final ပွဲကိုတော့ လာမယ့် ဒီဇင်ဘာ ၂၁ ရက်မှာ ရန်ကုန်မြို့ရှိ Time City Jewellery Mall ရှေ့မှာ စည်ကားသိုက်မြိုက်စွာကျင်းပသွားမှာလည်း ဖြစ်ပါတယ်။

အဆိုပါ Mister & Miss Christmas Star ပြိုင်ပွဲအကြောင်း Global Star Entertainment မှ CEO ကိုသန့်ဇင်အောင်၊ အလှမယ် ဟန်လေး၊ Presenter စိုးကြီးစတဲ့ တာဝန်ရှိသူတွေက ရှင်းလင်းပြောဆိုခဲ့ပါတယ်။

“Mister & Miss Christmas Star 2024 ပြိုင်ပွဲကတော့ ဒီဇင်ဘာလမှာ ကျင်းပနေကြ ပြိုင်ပွဲတစ်ခုပါ။ အရင်နှစ်တွေကတော့ Miss Christmas Star ဆိုပြီးတော့ပဲ ကျင်းပခဲ့တာ။ ဒီနှစ်ကတော့ Mister လေးတွေပါ ပါဝင်မယ့်ပွဲလေးပါ။ ဒီနှစ်မှာဆိုရင် အကဲဖြတ်ဒိုင် ၉ ယောက်က အကဲဖြတ်ပေးမှာပေါ့။ အမှတ်ပေးစည်းမျဉ်းဆိုရင်လည်း Beauty၊ Talent၊ Knowledge၊ Performance ပိုင်းအစ သေချာအကဲဖြတ်ပြီးတော့မှ တကယ်အကြိုက်ဆုံး Mister Christmas Star 2024 Winner တစ်ယောက်၊ Miss Christmas Star 2024 Winner တစ်ယောက်ကိုပဲ ရွေးချယ်သွားမှာပါ။ ဒီနှစ်ပြိုင်ပွဲကတော့ အရင်နှစ်တွေနဲ့ မတူဘဲ ထူးထူးခြားခြားအနေနဲ့ ကလေးတွေကို ကြိုတင်ရွေးချယ်ထားပြီးတော့ သူတို့ရဲ့ Catwalk ပိုင်း၊ Opening Dance ပိုင်းတွေကို သေချာလေး လေ့ကျင့်ပေးထားတယ်။ ဒီနှစ်ပြိုင်ပွဲကတော့ တကယ့်အရည်အချင်းရှိတဲ့ ကလေးတွေရဲ့ အရည် အသွေးတွေကို မြင်ရမှာပါ” လို့ Global Star Entertainment က CEO ကိုသန့်ဇင်အောင်က ပြောပါတယ်။

Mister & Miss Christmas Star 2024 ပြိုင်ပွဲမှာ လာရောက်လျှောက်ထားတဲ့ အလှမောင် ၃၀ ဦးကနေ အလှမောင် ၉ ဦး၊ အလှမယ်ပြိုင်ပွဲဝင် ၅၀ ဦးကနေ အလှမယ် ၁၀ ဦး၊ စုစုပေါင်းပြိုင်ပွဲဝင် ၁၉ ဦးတို့က ပါဝင်ယှဉ်ပြိုင်ကြမှာဖြစ်ပါတယ်။ အကဲဖြတ်ဒိုင်များအနေနဲ့ ဟန်လေး၊ မထက် (Pop Soul)၊ ကိုဇင်အောင်၊ ဂျွန်လွင်နဲ့ အတူ အကဲဖြတ်ဒိုင် ၉ ဦးက အကဲဖြတ်ပေးသွားမယ်လို့ သိရပါတယ်။

“ဟန်လေးကို ဒိုင်တစ်ယောက်အနေနဲ့ ဖိတ်ခေါ်တဲ့အတွက် ဒီပွဲလေးမှာ ဒိုင်အဖြစ် လာရောက်အကဲဖြတ်မှာပါ။ ဒီပွဲလေးက အရမ်းကောင်းတယ်။ ပြန်လည်ပြီးတော့ အသက်သွင်းပေးတဲ့အတွက်လည်း ကျေးဇူးတင်ပါတယ်။ အရင်တုန်းကဆိုရင် Miss Christmas ဆိုပြီး အမြဲကြားဖူးနေကြပါ။ ဒီပွဲလေးက အမျိုးသမီးငယ်လေးတွေ ညီမငယ်လေးတွေအနေနဲ့ ကိုယ့်အိပ်မက်တွေကို အကောင်အထည်ဖော်လို့ ရတဲ့ နေရာလေးပါ။ ဒီလိုမျိုး အကောင်အထည်ဖော်လို့ ရတဲ့နေရာလေးတစ်ခုကို လမ်းကြောင်း ဖွင့်ပေးတဲ့အတွက်လည်း ကျေးဇူးတင်ပါတယ်။ ဒီပွဲက သူတို့ရဲ့ဆက်လျှောက်မယ့်အနုပညာလမ်းကြောင်းအတွက် လှေကားထစ်တစ်ခုဖြစ်မယ်လို့ထင်ပါတယ်”လို့အလှမယ် ဟန်လေးက ပြောပါတယ်။

Mister & Miss Christmas Star ပြိုင်ပွဲက အနုပညာလှုပ်ရှားမှု Program တွေနဲ့ ခမ်းနားစွာ တင်ဆက်သွားမယ့် ပြိုင်ပွဲတစ်ခုဖြစ်ပြီး သရုပ်ဆောင်၊ အဆို၊ ဂီတပိုင်းဆိုင်ရာ နယ်ပယ်တစ်ခုခုမှာ ကျွမ်းကျင်တတ်မြောက်စေဖို့ ရည်ရွယ်ပြီး ပညာရှင်တွေက ပြိုင်ပွဲဝင်တွေ နှစ်သက်ရာ ဘာသာရပ်တွေကိုလည်း ပြသသင်ကြားပေးတဲ့ ပြိုင်ပွဲလည်း ဖြစ်ပါတယ်။