၆. ၁၂. ၂၀၂၄
Written by Thettant
အာဆီယံ ချန်ပီယံရှစ် AFF Mitsubishi Electric Cup 2024 အုပ်စု အဖွင့်ပွဲစဉ်ဖြစ်တဲ့ မြန်မာနဲ့ အင်ဒိုနီးရှားပွဲစဉ်အတွက် ပွဲကြိုလက်မှတ်တွေကို ဒီနေ့ ဒီဇင်ဘာ ၆ ရက်မှာ စတင်ရောင်းချပေးနေပြီလို့ သိရပါတယ်။
လက်မှတ်တွေကို သုဝဏ္ဏကွင်းရှေ့ ဝေဇယန္တာလမ်းမကြီးပေါ်မှာ မနက် ၁၀ နာရီကနေ ညနေ ၄ နာရီအတွင်း နေ့စဥ် ရောင်းချပေးသွားမှာဖြစ်ပြီး အထူးတန်း ၅၀၀၀ ကျပ်၊ ရိုးရိုးတန်း ၂၀၀၀ ကျပ် သတ်မှတ်ထားသလို ပွဲနေ့ဖြစ်တဲ့ ဒီဇင်ဘာ ၉ ရက်မှာတော့ သု၀ဏ္ဏကွင်းမှာ အထူးတန်း လက်မှတ်တွေကို ဂိတ်(၂) နဲ့ ရိုးရိုးတန်း လက်မှတ်တွေကိုတော့ ဂိတ်(၈) မှာ ရုံးချိန်အတွင်း ရောင်းချပေးသွားမှာပါ။
ဒါ့အပြင် မြန်မာ-အင်ဒိုနီးရှားပွဲ လာကြည့်မယ့် ပရိတ်သတ်တွေ အိမ်အပြန်အဆင်ပြေစေဖို့ အပြန်ကားတွေကိုလည်း ဘောလုံးအဖွဲ့ချုပ်က စီစဉ်ထားပြီး နီးစပ်ရာနေရာတွေအထိ ရောက်ရှိနိုင်မယ့် အခြေအနေနဲ့ အခမဲ့ စီစဉ်ပေးထားပါတယ်။
မြန်မာ့လက်ရွေးစင်အသင်းအနေနဲ့ အာဆီယံချန်ပီယံရှစ်ဖလားအတွက် အင်ဒိုနီးရှား၊ ဖိလစ်ပိုင်၊ လာအို၊ ဗီယက်နမ်တို့နဲ့ ယှဥ်ပြိုင်ရမှာဖြစ်ပြီး လာမယ့် ဒီဇင်ဘာ ၉ ရက်၊ ည ၇ နာရီအချိန် သုဝဏ္ဏကွင်းမှာ ၂၀၂၄ အာဆီယံချန်ပီယံရှစ် AFF Mitsubishi Electric Cup 2024 အုပ်စု(ခ) ပွဲစဉ်အဖြစ် မြန်မာနဲ့ အင်ဒိုနီးရှားတို့ ကစားကြမှာပါ။ ဒါ့အပြင် လာမယ့် ဒီဇင်ဘာ ၁၈ ရက် ညနေ ၅ နာရီမှာ လာအိုနဲ့ သုဝဏ္ဏကွင်းမှာပဲ အိမ်ကွင်းယှဥ်ပြိုင်ရမှာဖြစ်ပေမဲ့ ဒီဇင်ဘာ ၁၂ ညနေ ၅ နာရီမှာ ဖိလစ်ပိုင်၊ ဒီဇင်ဘာ ၂၁ ရက် ည ၇ နာရီခွဲမှာတော့ ဗီယက်နမ်တို့ကို အဝေးကွင်းမှာ ယှဥ်ပြိုင်ကစားရမှာဖြစ်ပါတယ်။
မြန်မာ့လက်ရွေးစင်အသင်း အနေနဲ့ ၂၀၂၄ အာဆီယံချန်ပီယံရှစ်ပွဲစဉ်တွေမတိုင်မီ ခြေစမ်းပွဲ ၄ ကစားခဲ့ရာမှာ လက်ဘနွန်ကို ၂ ဂိုး ၃ ဂိုးနဲ့ ရှုံးနိမ့်ခဲ့တဲ့ ပွဲစဥ်အပါအဝင် သွင်းဂိုး ၆ ဂိုးအထိ သွင်းယူနိုင်ခဲ့ပါတယ်။
