၅.၁၂.၂၀၂၄
Written By Zun
မူးယစ်ဆေးထုတ်လုပ်မည့် ဓာတုပစ္စည်းများကို ကရင်ပြည်နယ်၊ မြဝတီဘက်သို့ပို့ဆောင်ရန် လုပ်ဆောင်နေသော မြန်မာ ၄ ဦးကို ထိုင်းတပ်မတော်က ဖမ်းဆီးထားကြောင်း ထိုင်းဒေသတွင်း သတင်းများတွင် ဖော်ပြကြသည်။
ယမန်နေ့ ဒီဇင်ဘာလ ၄ ရက် ညနေ ၆ နာရီအချိန်ခန့်က ထိုင်းတပ်မတော်အနေဖြင့် ထိုင်းနိုင်ငံ၊ တာက့်ခရိုင်၊ ဖိုးဖမြို့နယ်၊ ချောင့်ခဲ့ပ်ကျေးရွာအုပ်စု၊ ငေါင်ဖိုင်ကျေးရွာ အုပ်စုအတွင်း နယ်မြေလုံခြုံရေးကင်းလှည့်နေစဉ် မသင်္ကာဖွယ်ရာ လူတစ်စုကို တွေ့ရှိ ဖမ်းမိခဲ့ခြင်းဖြစ်ကြောင်း သိရသည်။
ယင်းကြောင့် အဆိုပါလူတစ်စုကို ခေါ်ယူ၍ ဖော့ဖယရဲစခန်း၏ ရဲအရာရှိများက စစ်ဆေးခဲ့ရာ မြန်မာနိုင်ငံ သားများဖြစ်နေပြီး ယင်းတို့က မူးယစ်ဆေးထုတ်လုပ်ရာတွင် အသုံးပြုမည့် ဓာတုပစ္စည်းများဖြစ်သော ဆာလဖျူရစ်အက်ဆစ်၊ နိုက်ထရစ်အက်ဆစ်နှင့် အခြား ဓာတုပစ္စည်းများ စုစုပေါင်း ဓာတုဆေးဝါး ၉ စည်ကို တရားမဝင် ပို့ဆောင်ရန်လုပ်ဆောင်နေစဉ် ဖမ်းမိခဲ့ခြင်း ဖြစ်ကြောင်း သိရသည်။
အဆိုပါ ဓာတုပစ္စည်းများနှင့်တွေ့ရှိခဲ့သည့် မြန်မာအမျိုးသားလေးဦးမှာ အသက် ၃၉ နှစ်အရွယ် မျိုးသူ၊ အသက် ၄၀ အရွယ် ကိုထွန်း၊ အသက်၂၇ နှစ်အရွယ် တူးလော်၊ အသက် ၃၁ နှစ် အရွယ် ကိုသို တို့ဖြစ်ကြေင်း သိရသည်။
ယခုအခါ ဖမ်းမိထားသူ ၄ ဦး ကို ဖော့ဖယရဲစခန်း၌ ချုပ်နှောင်ထားပြီး ထိုင်းနိုင်ငံ အကောက်ခွန်လုပ်ထုံးလုပ် နည်းများဥပဒေအရ အကောက်ခွန်ဌာနက အရေးယူဆောင်ရွက်ရန် လုပ်ဆောင်နေကြောင်း သိရသည်။
Sources-thebangkoktimes & siamrath
