၄.၁၂.၂၀၂၄
Written By Thandar
Mahar Original Series က ထုတ်လုပ်ထားတဲ့ အိမ်ထောင်ရေး ဒရာမာဇာတ်လမ်းပုံစံ “သစ္စာမဲ့ကြောင်း ထင်ရှားပါသဖြင့်” ဇာတ်လမ်းတွဲ Press Conference အခမ်းအနားကို ယနေ့ ဒီဇင်ဘာ ၄ ရက် နံနက်ပိုင်းက ရန်ကုန်မြို့ Kantharyar Shopping Mall ရှိ Rangoon Cineplex မှာ ကျင်းပခဲ့ပါတယ်။
“စူရဲ့ ဒီဇာတ်လမ်းတွဲမှာ စရိုက်ချိန်က သမီးလေး ကိုယ်ဝန်စရှိချိန်မို့ လူကပိန်သလိုဖြစ်သွားတယ်။ အ လုပ်တွေက လက်ခံထားပြီးသားဆိုတော့လေ။ ပန်းဖြူဆိုတဲ့ အိမ်ထောင်ရှင် အမျိုးသမီးတစ်ယောက်နေရာက မြင်တွေ့ရမှာပါ။ စူက ဒီဇာတ်ကားမှာ အသက်ကြီးပိုင်းအထိ ရိုက်ရတာလေးတွေ ပါတယ်။ ဒီကားရိုက်မှာ အရမ်း ပင်ပန်းတယ်။ လုပ်ရတဲ့မုဒ်တွေက ပုံမှန်သရုပ်ဆောင်နေကြကားနဲ့လည်း မတူဘူးပေါ့။ အမှတ်ရစေမယ့် ဇာတ်ကားလို့ စူပြောလို့ရပါတယ်။ ကိုယ့်အမျိုးသားက မထင်မှတ်ထားတဲ့ပြောင်းလဲမှုတွေ လုပ်ခဲ့တာကြောင့်လေ။ အရမ်းစူးနစ်ခဲ့ရတယ်ပေါ့။ စူ့အတွက် အရမ်းလုပ်ခွင့်ရတဲ့ကားလေးပါ။ ပရိသတ်တွေလည်း တစိမ့်စိမ့် ခံစားချက်တွေရမယ်လို့ ပြောချင်ပါတယ်” လို့ သရုပ်ဆောင်အိချောပိုက ပြောပါတယ်။
အဆိုပါ ဇာတ်ကားမိတ်ဆက်ပွဲကိုတော့ သတ္တိ၊ တေဇလင်းရောင်၊ စိန်လင်း@တိုးတက်၊ အိချောပို၊ ခြူးလေး၊ ယွန်းယွန်း၊ ချိုမဒီသွင်၊ သဒ္ဒါနန်းထိုက် စတဲ့သူတွေတက်ရောက်ခဲ့ကြပါတယ်။
ဒီဇာတ်လမ်းတွဲကို ဇာတ်လမ်း၊ ဇာတ်ညွှန်း သက်ဦးမောင်ကရေးသားပြီးတော့ ဒါရိုက်တာ ပွင့်သိင်္ဂီဇော်က သရုပ်ဆောင်တွေဖြစ်တဲ့ လွှမ်းပိုင်၊ တေဇလင်းရောင်၊ အိချောပို၊ ခြူးလေး၊ ယွန်းယွန်း၊ ခြူးစစ်ဟန်၊ ဟိန်းသစ်စ၊ ချိုမဒီသွင်၊ ခွန်းည စတဲ့သူတွေနဲ့ ရိုက်ကူးပါဝင်ထားကြပါတယ်။
အပိုင်း ၂၀ ပါဝင်တဲ့ “သစ္စာမဲ့ကြောင်း ထင်ရှားပါသဖြင့်” ဇာတ်လမ်းတွဲသစ်ကို အပတ်စဥ် တနင်္လာ ၊ ဗုဒ္ဓ ဟူး ၊ သောကြာ ၊ စနေ နဲ့ တနင်္ဂနွေနေ့တွေရဲ့ ည ၇ နာရီတိုင်းမှာ Mahar Application က ထုတ်လွှင့်ပြသနေပြီလည်း ဖြစ်ပါတယ်။