“သစ္စာမဲ့ကြောင်း ထင်ရှားပါသဖြင့်” ဇာတ်လမ်းတွဲမှာ ကိုယ့်ဘဝထဲကို မေတ္တာတွေပေးဖို့ဝင်လာခဲ့ပေမယ့် အတိတ်ရဲ့ ကံကမျက်နှာသာမပေးတဲ့ နဒီမောင်ကာရိုက်တာမြင့်တွေ့ရမှာပါဆိုတဲ့ ချိုမဒီသွင်

၁.၁၂.၂၀၂၄
Written By Thandar
 
ပရိသတ်အားပေးမှုရရှိလာတဲ့ သရုပ်ဆောင် ချိုမဒီသွင်ကတော့ “သစ္စာမဲ့ကြောင်း ထင်ရှားပါသဖြင့်” ဇာတ်လမ်းတွဲမှာ ကိုယ့်ဘဝထဲကို မေတ္တာတွေပေးဖို့ဝင်လာခဲ့ပေမယ့် အတိတ်ရဲ့ ကံက မျက်နှာသာမပေးတဲ့ နဒီမောင်ကာရိုက်တာမြင့်တွေ့ရမှာပါလို့ဆိုပါတယ်။

“ချို သစ္စာမဲ့ကြောင်း ထင်ရှားပါသဖြင့် ဇာတ်လမ်းတွဲရဲ့ ဇာတ်ညွှန်းလေးကို ဖတ်ကြည့်ချိန်မှာ နဒီမောင် ဆိုတဲ့ ကာရိုက်တာနေရာက ခံစားကြည့်ဖြစ်တယ်။ သူ့ရဲ့နေရာက အရမ်းသနားဖို့ကောင်းတယ်။ သနားစရာ ကောင်မလေးအဖြစ်နဲ့ နဒီမောင်ကို မြင်မိတယ်။ နဒီမောင်က ခေတ်လူငယ်ကောင်မလေး တစ်ယောက် ဒါပေမယ့် အရမ်းဟော့ဟော့ရမ်းရမ်းလည်း မဟုတ်ဘူး။ တကယ့်ကို ရိုးရိုးအေးအေးထဲမှာလည်း မပါဘူး။ ပုံမှန်လေးပေါ့။ ဘယ်သူမှမရှိတဲ့ ဒီ နဒီမောင်ဆိုတဲ့ ကောင်မလေးရဲ့ ဘဝထဲကို မေတ္တာတွေပေးဖို့ ဝင်လာခဲ့ပေမယ့် အတိတ်ရဲ့ ကံက မျက်နှာသာမပေးခဲ့ဘူးပေါ့နော်”လို့ သရုပ်ဆောင် ချိုမဒီသွင်က ပြောပါတယ်။

ဒီဇာတ်လမ်းတွဲကို ဇာတ်လမ်း၊ ဇာတ်ညွှန်း သက်ဦးမောင်ကရေးသားပြီးတော့ ဒါရိုက်တာ ပွင့်သိင်္ဂီဇော်က သရုပ် ဆောင်တွေဖြစ်တဲ့ လွှမ်းပိုင်၊ တေဇလင်းရောင်၊ အိချောပို၊ ခြူးလေး၊ ယွန်းယွန်း၊ ခြူးစစ်ဟန်၊ ဟိန်းသစ်စ၊ ချိုမဒီသွင်၊ ခွန်းည စတဲ့သူတွေနဲ့ ရိုက်ကူးပါဝင်ထားကြပါတယ်။

“ကာရိုက်တာအတွက် တော်တော်လေးကို ချိုပြင်ဆင်ခဲ့ရတယ်။ ဒီဇာတ်လမ်းတွဲကို ရိုက်ကူးချိန်မှာ ဇာတ်ဝင်ခန်းတော်တော်များများက တော်တော်လေးကို အားထုတ်ခဲ့ရတဲ့ ဇာတ်ဝင်ခန်းတွေပါပဲ။ ဘာလို့လဲဆိုတော့ နဒီမောင်ရဲ့ ကာရိုက်တာနေရာက ဆင်းန်တိုင်းမှာ ကြီးကြီးမားမား လုပ်ဆောင်ထားတာလေးတွေ တွေ့ရမှာပါ ”လို့ သူကဆက်ပြောပါတယ်။

ပရိသတ်တွေ စိတ်ဝင်စားစရာ ဇာတ်လေးတွေ တင်ဆက်ပေးလေ့ရှိတဲ့ Mahar Application က ဒီဇင်ဘာ ၃ ရက်မှာ အပိုင်း ၂၀ ပါဝင်တဲ့ “သစ္စာမဲ့ကြောင်း ထင်ရှားပါသဖြင့်” ဇာတ်လမ်းတွဲသစ်ကို အပတ်စဥ် တနင်္လာ ၊ ဗုဒ္ဓဟူး ၊ သောကြာ ၊ စနေ နဲ့ တနင်္ဂနွေနေ့တွေရဲ့ ည ၇ နာရီမှာ ထုတ်လွှင့် ပြသမှာလည်း ဖြစ်ပါတယ်။