၃၀.၁၁.၂၀၂၄
Written By Thandar
အနုပညာပိုင်းမှာ ပရိသတ်တွေကို ကာရိုက်တာမျိုးစုံနဲ့ဖမ်းစားတတ်တဲ့ ရုပ်ရှင်နဲ့ဗီဒီယိုသရုပ်ဆောင် ပြေတီဦးရဲ့ နိုဝင်ဘာ ၃၀ ရက်မှာကျရောက်တဲ့ အသက် ၄၆ နှစ်ပြည့် မွေးနေ့ကို ဇနီးဖြစ်သူ အိန္ဒြာကျော်ဇင်နဲ့အတူ အရုဏ်ဆွမ်းကပ်ကုသိုလ်ယူခဲ့ပါတယ်။ ဒါ့အပြင် သူ့ရဲ့ မွေးနေ့အတွက် ပြေတီဦး Fan တွေက ထမင်းနဲ့ဟင်း လူအယောက် ၂၅၀စာ ဒဂုံဆိပ်ကမ်းဘက်မှာ လှူဒါန်းပေးခဲ့ပါတယ်။
“အကို့ မွေးနေ့မှာ အရုဏ်ဆွမ်း ဆက်ကပ်လှူဖြစ်ပါတယ်။ ချစ်သော Fan တွေလည်း အလွမ်းပြေစေသတည်း”လို့ ဇနီးဖြစ်သူ အကယ်ဒမီ အိန္ဒြာကျော်ဇင်က ပရိသတ်သိအောင် ပြောလာပါတယ်။
သူတို့ ဇနီးမောင်နှံကတော့ ပရိသတ်တွေ အလွမ်းပြေအောင်လို့ ဓာတ်ပုံလေးပါ မျှဝေလာတာပဲ ဖြစ်ပါတယ်။ ပြေတီဦးကတော့ ပညာရေးနဲ့ပတ်သက်ပြီး ပြေတီဦးဖောင်ဒေးရှင်းကို ၂၀၀၉ ခုနှစ် နိုဝင်ဘာ ၃၀ ရက် မွေးနေ့မှာ စတင်တည်ထောင်ခဲ့တာလည်းဖြစ်ပါတယ်။
ပရိသတ်အချစ်တော်မင်းသား ပြေတီဦးကတော့ အမျိုးသားဇာတ်ဆောင်ဆုတွေအဖြစ် ၂၀၁၀ အာဒံရယ် ဧဝရယ် ဒဿရယ် ရုပ်ရှင်ဇာတ်ကား၊ ၂၀၁၂ ခုနှစ်က လက်ပံရုပ်ရှင်ဇာတ်ကား၊ ၂၀၁၃ ခုနှစ်က နင်စေရင် ရုပ်ရှင်ဇာတ်ကား၊ ၂၀၁၄ခုနှစ်က နှလုံးသားဖြင့်ပြုလုပ်သည် ရုပ်ရှင်ဇာတ်ကားနဲ့ ၂၀၂၂ ခုနှစ်က လိပ်ပြာထောင်ချောက် ရုပ်ရှင်ဇာတ်ကားတွေနဲ့ ဆုတွေကို ပိုင်ဆိုင်ထားသူလည်း ဖြစ်ပါတယ်။
