၂၇.၁၁.၂၀၂၄
Written By Thandar
ဂမ္ဘီရဆန်ဆန် ထိတ်လန့်ခြောက်ခြားဖွယ် ဒရာမာဇာတ်လမ်းပုံစံ “ဝမ်းတွင်းကဝေ မောင်မိုးဆွေ” ဇာတ် လမ်းတွဲ မိတ်ဆက်ပွဲအခမ်းအနားကို ယနေ့ နိုဝင်ဘာ ၂၇ ရက် နံနက်ပိုင်းက ရန်ကုန်မြို့ M3 Food Center မှာ ကျင်း ပခဲ့ပါတယ်။
“ မြက ဒီဇာတ်လမ်းတွဲမှာ ကလျာဆိုတဲ့တောသူလေး ကာရိုက်တာနဲ့ပေါ့။ အဓိက လူငယ်တွေက စူးစမ်း လေ့လာချင်တယ်။ ကိုယ်တိုင်ကလည်း ဂမ္ဘီရပညာရပ်တွေဆိုတာ နားထောင်ရင် စိတ်ဝင်စားစရာလည်း ဖြစ်တယ်။ မြတို့က လူငယ်တွေဖြစ်ပေမယ့် ဒီစာအုပ်တွေကို ဖတ်ပြီးလေ့လာရင်းနဲ့ စိတ်ဝင်စားသွားခဲ့ပါတယ်။ မြ ရုပ်ရှင်ကားကြီးမှာဆိုရင်တော့ Horror တို့ ဒရာမာတို့ ဟာသတွေပဲ ရိုက်ကြတာများတယ်။ ဒါဆိုရင် မြရဲ့ ဒုတိယမြောက်ဇာတ်လမ်းတွဲပါ။ ဇာတ်လမ်းတွဲ ၃ ခုရိုက်တာ ၂ ခုက ဂမ္ဘီရဇာတ်တွေဖြစ်နေတယ်။ မြအတွက် အဆန်းအပြား ဂမ္ဘီရဇာတ်တွေရိုက်ရတာပါ ”လို့ သရုပ်ဆောင် မြယာကပြောပါတယ်။
ထက် ဗီဒီယိုထုတ်လုပ်ရေးက ဇာတ်လမ်း မောင်ပိုင် (ပုလဲ)၊ ဇာတ်ညွှန်း လှဝင်း(အေဝမ်း)တို့က ရေးသားထားပြီးတော့ ဒါရိုက်တာ ထက်ကျော်က လာမယ် နိုဝင်ဘာ ၃၀ ရက်မှာစတင်ပြီး သန်လျင်မြို့နယ်ဘက်မှာ ရိုက်ကူးပုံဖော်သွားမယ့် ဂမ္ဘီရဆန်ဆန် ထိတ်လန့်ခြောက်ခြားဖွယ် ဒရာမာဇာတ်လမ်းလေးဖြစ်တယ်လို့ သိရပါတယ်။
သရုပ်ဆောင်တွေဖြစ်တဲ့ ဟင်နရီစံ၊ ဇာတိ၊ မြယာ၊ သံစဉ်ဖြိုးပိုင်၊ ဇော်ဝင်းနိုင်(မန်း) စတဲ့အနုပညာရှင်တွေက ပါဝင်ကြမှာဖြစ်ပါတယ်။
“ကျွန်တော်က ဒီလို ဂမ္ဘီရဇာတ်တွေ အရင်ကတည်းက ရိုက်လာသူမို့ ကံစပ်လာတယ်လို့ ပြောလို့ရတယ်။ကြိုးစားဆဲ လူတွေဆိုတော့ ဒီဇာတ်လမ်းတွဲအတွက် အားစိုက်ထားပါတယ်။ ထုတ်လုပ်ရေးတူပေမယ့် ဇာတ်လမ်းတွဲ အတူ ဆုံဖြစ်တာက ပထမဦးဆုံး ဆံုကြတဲ့ ဇာတ်လေးပါ။ ပရိသတ်တွေ အမြင်ဆန်းမယ့် ဇာတ်လမ်းလေးပါ”လို့ သရုပ်ဆောင် ဇာတိက ပြောပါတယ်။
