၂၆.၁၁.၂၀၂၄
Written By Thandar
CANAL+ ရဲ့ကိုယ်ပိုင်ဖန်တီးမှုနဲ့ အိမ်ထောင်ရေး ဒရာမာဇာတ်လမ်းပုံစံ “နွယ်” ရုပ်သံဇာတ်လမ်းတွဲသစ် မိတ် ဆက်ပွဲကို ယနေ့ နိုဝင်ဘာ ၂၆ ရက် နေ့လယ် ၂နာရီက ရန်ကုန်မြို့ Kamtharyar Shopping Center ရှိ Rangoon Cineplex မှာ ကျင်းပခဲ့ပါတယ်။
“ယမင်းကတော့ ဒီဇာတ်လမ်းတွဲမှာ ပတ်ဝန်းကျင်နဲ့ မိသားစုတွေအပြင် လူတိုင်းက လေးစားအားကျရတဲ့ အိမ်ထောင်ရေးကို ပိုင်ဆိုင်ထားတဲ့ အသက် ၂၄ နှစ်အရွယ် မြတ်ဆိုတဲ့ ကာရိုက်တာနဲ့ပါဝင်ထားပါတယ်။ မြတ်ကတော့ တကယ်တော့ မထင်မှတ်ထားတဲ့ ဝမ်းနည်းကြေကွဲစရာ မျှော်လင့်မထားတဲ့ အိမ်ထောင်ရေးစိန်ခေါ်မှုတွေကို ကြုံလာရတာလေးကို အကောင်းဆုံးကြိုးစားထားပါတယ်။ ယမင်းရဲ့ ကာရိုက်တာကို ကြည့်ပြီး ဝေဖန်အားပေးကြပါဦးလို့ ပြောချင်ပါတယ်”လို့ သရုပ်ဆောင် ယမင်းမေဦးက ပြောပါတယ်။
ဒီဇာတ်ကားမှာ ဒါရိုက်တာ အောင်မြတ်က သရုပ် ဆောင်တွေဖြစ်တဲ့ တီစော၊ အောင်ရဲထိုက်၊ ယမင်းမေဦး၊ မေတိုးခိုင်၊ ရဲနောင်ချို၊ ခိုင်နှင်းဝေ၊ ဆင်မ၊ မျိုးမျိုးခိုင်၊ သုန္ဒြေဦး စတဲ့ သူတွေနဲ့ ရိုက်ကူးထားပါတယ်။
၂၆ မိနစ်စာအပိုင်း ၄၀ ပါဝင်တဲ့ “နွယ်” ဒရာမာ ရုပ်သံဇာတ်လမ်းတွဲကြီးကို လာမယ့် ဒီဇင်ဘာ ၁၆ ရက်နေ့က စတင်ပြီး အပတ်စဉ် တနင်္လာနေ့ကနေ သောကြာနေ့ထိ ည ၇ နာရီခွဲမှာ CANAL+ Zat Lenn က ကြည့်ရှုရမှာဖြစ်ပါတယ်။