၂၆.၁၁.၂၀၂၄
Written By Thandar
လူငယ်ဆန်ဆန် အချစ်ဇာတ်လမ်းပုံစံ “စွယ်တော်ရွက်ပုံပြင်” ဇာတ်လမ်းတွဲ မိတ်ဆက်ပွဲကို ယနေ့ နိုဝင်ဘာ ၂၆ ရက် နံနက် ၉ နာရီက ရန်ကုန်မြို့၊ ကန်သာယာစင်တာရှိ Rangoon Cineplex မှာ ကျင်းပခဲ့ပါတယ်။
ဒီဇာတ်လမ်းတွဲ မိတ်ဆက်ပွဲကိုတော့ ဒါရိုက်တာ သားညီနဲ့အတူ သရုပ်ဆောင် ထူးအောင်၊ ၀ဏ္ဏအောင် (ခေါ်) ရှိန်း၊ ဆုထက်၊ အေးသန္တာဘို၊ အနှစ်စတဲ့ အနုပညာရှင်များစွာ တက်ရောက်ခဲ့ကြပါတယ်။
“ဒီဇာတ်လမ်းလေးက ဒရာမာကားလားဆိုရင် မဟုတ်ပါဘူး၊ ဟာသကားလားလို့မေးရင်လည်း မဟုတ်ပါဘူး။ ပရိသတ်တွေ အနေနဲ့ ဒီဇာတ်လမ်းလေးကို ကြည့်ရင်း ငိုလည်းငိုရမယ်။ ပျော်လည်း ပျော်ရမယ်။ ရယ်လည်း ရယ်ရမှာပါ။ သေချာတာ တစ်ခုကတော့ ဒီကားလေးကိုကြည့်ပြီး ပရိသတ်အကြိုက်တွေ့မှာပါ။ လက်ရှိ အပိုင်း ၂ အထိ ထုတ်လွှင့်ချိန်မှာလည်း ပရိသတ်တွေကြိုက်လို့ ပီတိဖြစ်ရပါတယ်”လို့ ဒါရိုက်တာ သားညီက ပြောပါတယ်။
အဆိုပါ ဇာတ်လမ်းတွဲကို ဇာတ်လမ်း၊ ဇာတ်ညွှန်း နွေဦးကျော်က ရေးသားပြီး ဒါရိုက်တာ သားညီက သရုပ်ဆောင် ထူးအောင်၊ ၀ဏ္ဏအောင် (ခေါ်) ရှိန်း၊ ဆုထက်၊ အေးသန္တာဘို၊ အနှစ် စတဲ့ အနုပညာရှင်များစွာက ပါဝင်သရုပ်ဆောင်ထားကြပါတယ်။
“ညီမ ဒီကားမှာ သံစဉ်ချိုဆိုတဲ့ ခပ်စွာစွာ ကာရိုက်တာနေရာလေးက ပါဝင်သရုပ်ဆောင်ထားတယ်။ ကာရိုက်တာနဲ့ပတ်သက်ပြီးတော့ စိတ်ပူခဲ့ရတာမို့လေ။ ကိုထူးအောင်နဲ့ Ro ရတဲ့ Scene တွေကို စိတ်ပူခဲ့ရတယ်။ ပရိသတ်တွေဆီက ဇာတ်ကားကြည့်ပြီ ဘယ်လိုပြန်ပြီး Feedback ပေးမလဲဆိုတာတော့ စိတ်လှုပ်ရှားပါတယ်”လို့ သရုပ်ဆောင် ဆုထက်ကပြောပါတယ်။
အပိုင်း (၁၀)ပိုင်း ပါဝင်တဲ့ “စွယ်တော်ရွက်ပုံပြင်” ဇာတ်လမ်းတွဲကို Fortune TV ရုပ်သံလိုင်းနဲ့ Application တို့မှာ အပတ်စဉ် စနေနဲ့ တနင်္ဂနွေနေ့တိုင်းမှာ ထုတ်လွှင့်ပြသလျက်ရှိတယ်လို့ သိရပါတယ်။
