၂၆.၁၁.၂၀၂၄
Written By Thandar
ထိတ်လန့်ခြောက်ခြားဖွယ်ဇာတ်လမ်းပုံစံ “Brown Jackets @ပရလောကခရီးရှည်တစ်ခု” ဇာတ်လမ်းတွဲ ကန်တော့ပွဲပေးအခမ်းအနားကို နိုဝင်ဘာ ၂၅ ရက် နံနက် ၈ နာရီက ရန်ကုန်တိုင်း၊ အလုံမြို့နယ်ရှိ အိမ်တော်ရာဘုရားမှာ ကျင်းပခဲ့ပါတယ်။
“လီလီကတော့ ဒီဇာတ်လမ်းတွဲမှာ သော်တာ ကာရိုက်တာနဲ့ပါဝင်သရုပ်ဆောင်ထားပါတယ်။ ဒီကားပုံစံလေးက အဖွဲ့လေး ၅ ယောက်ရှိတယ်ပေါ့။ ပရလောကဆိုတဲ့အတိုင်းပေါ့။ Brown Jackets ဆိုတဲ့အတိုင်း အဖွဲ့လေးက Horror လေးဆိုတော့ သရဲဖမ်းတဲ့ အဖွဲ့ပေါ့။ လီလီကတော့ နှစ်ဘဝ ဇာတ်လမ်းစတည်ကထဲက သေချာပြင်ဆင်ထားပါတယ်။ လီလီရဲ့ မတူညီတဲ့ ကာရိုက်တာ မြင်တွေ့ရမှာပါ။ ဒီဇာတ်လမ်းလေးက ပရိသတ်တွေ မမြင်ရတာကြာပြီဖြစ်တဲ့ သရုပ်ဆောင်တွေရော ပြန်လည်ခေါ်ယူပုံဖော်ထားပါတယ်။ ဇာတ်လမ်းက ဆန်းတယ်။ ထွက်လာရင် အားပေးကြလို့ ပြောချင်ပါတယ်”လို့ သရုပ်ဆောင် လီလီကျော်ခိုင်ကပြောပါတယ်။
Twenty Three က စီစဉ်ရိုက်ကူးမယ့် ဇာတ်ညွှန်း အာကာစိုးဦးနဲ့ ရွန်းမီမီထက်တို့က ရေးသားပြီး ဒါရိုက်တာ အာကာစိုးဦးရဲ့ ဇာတ်လမ်းကို သရုပ်ဆောင်တွေအနေနဲ့ အကယ်ဒမီ ထွန်းထွန်း၊ မင်းဘုန်းမြတ်၊ သီဟတင်အောင်စိုး၊ လီလီကျော်ခိုင်၊ နေခြည်ရွှန်းလဲ့၊ နေနွယ်ဇင်လင်း၊ မင်းသူ၊ ဇွဲနိုင်ဝင်း၊ ဘုန်းလျှံ၊ ညီဂျော်၊ အေးမင်းဟိန်း၊ ဆုတထက်ကုဋေ၊ မိုးခမ်း စတဲ့သူတွေ ပါဝင်ကြမှာဖြစ်ပါတယ်။
