၂၁.၁၁.၂၀၂၄
Written by Thandar
ရုပ်သံဇာတ်လမ်းတွဲတွေကတစ်ဆင့် ပရိသတ်အားပေးမှုများစွာ ရရှိထားတဲ့ သရုပ်ဆောင် ဝေလာရီက “သူနိုင်ကိုယ်နိုင် ” ရုပ်ရှင်ဇာတ်ကားကြီးမှာ ဝေလာ့အတွက် အရင်ဇာတ်ကားတွေနဲ့ မတူညီ လုံးဝကွဲပြားတဲ့ ယောက်ျားစိတ်ပေါက်နေတဲ့ Tomboy ပုံစံ ဂဏန်းမဆိုတဲ့ ကာရိုက်တာနဲ့မြင်တွေရမှာလို့ဆိုပါတယ်။
“ဝေလာ့အတွက် ဒီဇာတ်ကားက အရင်ရိုက်ကူးခဲ့တဲ့ ကာရိုက်တာတွေ လုံးဝကို မတူညီဘဲ ကွဲပြားတဲ့ ဇာတ်ရုပ်ပါ။ ဝေလာ ၂၀၂၄ ခုနှစ်မှာ ပထမဆုံး ရိုက်ခဲ့တဲ့ ရုပ်ရှင်ကားကြီးလို့ပြောလို့ရတယ်။ LGBT ပေါ့။ နည်းနည်း ယောက်ျားစိတ်ပေါက်နေတဲ့ Tomboy ပုံစံ ဂဏန်းမဆိုတဲ့ ကာရိုက်တာနဲ့ မြင်တွေ့ရမှာပါ။ ကိုယ်က မနေဆန်းကို သဘောကျ နှစ်သက်နေသူပေါ့နော်။ မရွှေမှုန်@ရွှေမှုန်ရတီရဲ့ ညီမလေး နေရာကပါ။ ဒီကားက ပုဂံမှာ ရိုက်ကူးခဲ့တာပါ။ ဒီဇာတ်ကားမှာက ရွှေနှစ်ရွှေ Couple လေးရိုက်ကူးထားတဲ့ကားလေးပေါ့။ သူတို့နှစ်ယောက်ကလည်း အရမ်းကို သဘောကောင်းကြပါတယ်။ မကြာခင် ရုံတင်ရင်လည်း အားပေးပါဦးလို ပြောချင်ပါတယ်”လို့ သရုပ်ဆောင် ဝေလာရီက ပြောပါတယ်။
အားမာန်ရုပ်ရှင်ထုတ်လုပ်ရေးက ကိုနိုင်ဆွေ၊ မအေးမော်လေး စီစဉ်ထုတ်လုပ်တဲ့ ဒီရုပ်ရှင်ဇာတ်ကားကြီးကို ဇာတ်လမ်း ကိုရွှေ၊ ဇာတ်ညွှန်း မင်းကိုစိုး(နတ်သံကွင်း)က ရေးသားပြီး ဒါရိုက်တာ ကိုဇော်(အရုဏ်ဦး) က သရုပ်ဆောင်တွေဖြစ်တဲ့အကယ်ဒမီ ရွှေထူး၊ အကယ်ဒမီ ရွှေမှုန်ရတီ၊ ခင်လှိုင်၊ ဝေလာရီ၊ တက္ကသိုလ်ဂွမ်းပုံ၊ သွက်လက်၊ နေဆန်း(မွန်) ၊ မိုးညို၊ ရန်ပြေ(ကျော်ကြီး)၊ သီဟ၊ သိန်းဇံ စတဲ့သူတွေနဲ့ ရိုက်ကူးပါဝင်ထားကြပါတယ်။
ကျေးလက်ဟာသပုံစံ “သူနိုင်ကိုယ်နိုင်” ရုပ်ရှင်ဇာတ်ကားကို မကြာခင် မြန်မာတစ်ပြည်လုံးရှိ အဆင့်မြင့် ရုပ်ရှင်ရုံတွေမှာ ဒီလအတွင်း ရုံတင်ပြသတော့မှာလည်း ဖြစ်ပါတယ်။
