၁၉.၁၁.၂၀၂၄
Written By Thandar
အကယ်ဒမီ မြင့်မြတ်နဲ့ အလှမယ် သဲစုညိမ်းတို့ ရိုက်ကူးမယ့် “ပွဲ” ရုပ်ရှင်ဇာတ်ကားကြီးကန်တော့ပွဲပေး အခမ်းအနားကို ယနေ့ နိုဝင်ဘာ ၁၉ ရက် နံနက်ပိုင်းက ရန်ကုန်မြို့၊ သင်္ဃန်းကျွန်းမြို့နယ်ရှိ ကျိုက္ကဆံဘုရားမှာ ကျင်းပခဲ့ပါတယ်။
“ဒီနေ့က ပွဲ ရုပ်ရှင်ဇာတ်ကားကို ကန်တော့ပွဲအခမ်းအနားပါ။ ထုတ်လုပ်ရေးဘက်ကပဲ သရုပ်ဆောင်တွေကို ရွေးချယ်ထားတာပါ။ မြင့်မြတ်ကလည်း ဇာတ်တွေလည်း လိုက်တဲ့သူဆိုတော့ ပြောစရာမရှိပါဘူး။ ဒီဇာတ်ကားလေးက ပရိသတ်တွေ ပျော်ရွှင်ရယ်မောစေမယ့် ဇာတ်လမ်းလေးပါ။ နဂိုရှိပြီးသားဇာတ်လေးပါ။ သဲစုညိမ်းလေးပါလာတော့ ဇာတ်ကောင်လေးကို နည်းနည်းပြောင်းလိုက်တာပါ။ သဲသဲနဲ့လိုက်မယ့်ပုံစံလေးပေါ့။ ဒီဇာတ်ကားလေးက ထူးထူးခြားခြား ဇာတ်လေးပါ”လို့ ဒါရိုက်တာ ကိုဇော်(အရုဏ်ဦး)က ပြောပါတယ်။
Bo Bo Film Production က ထုတ်လုပ်မယ့် ဇာတ်ကားကြီးကို ဇာတ်လမ်း ဒီဒီထက်အောင်၊ ဇာတ်ညွှန်းပိုင်းကို ဒီဒီထက်အောင်၊ မင်းကိုစိုး(နတ်သံကွင်း)တို့က ရေးသားပြီး ဒါရိုက်တာ ကိုဇော်(အရုဏ်ဦး) က ကျေးလက်ဒေသနဲ့ မြို့ကြီးတချို့မှာ ဟာသဇာတ်လမ်းပုံစံလေး ရိုက်ကူးပုံဖော်သွားမှာလည်း ဖြစ်ပါတယ်။
သရုပ်ဆောင်တွေအနေနဲ့ အကယ်ဒမီ မြင့်မြတ်၊အကယ်ဒမီ ကျော်ကျော်ဗို၊ ညီထွဋ်ခေါင်၊ အကယ်ဒမီ စိုးမြတ်သူဇာ၊ နော်ဖောအယ်ထား၊ အလှမယ် သဲစုညိမ်း၊ ခင်လှိုင်၊ ဇော်ဝင်းနိုင်(မန်း)၊ သွက်လက်စတဲ့ အခြား အနုပညာရှင်များစွာက ပါဝင်အားဖြည့်သွားမှာ ဖြစ်ပါတယ်။
