၁၅.၁၁.၂၀၂၄
Written By Thandar
အလှူဒါယကာ ကိုမျိုးမင်းဦးနဲ့ အလှူဒါယိကာမ မမေမင်းမာန် (ခ) Ella May(မော်ဒယ်လ်) ရဲ့ သမီးသုန္ဒရီဦးတို့ “ရွှေသုန္ဒရီစိန်ရွှေရတနာဆိုင်” မိသားစုက
ဆရာတော် အရှင် သိရိစန္ဒသူရိယမထေရ်ကို သိက္ခာထပ်အလှူတော်မင်္ဂလာနဲ့ စုပေါင်းမဟာဘုံကထိန် အလှူတော်မင်္ဂလာပွဲ အခမ်းအနားကို ယနေ့ နိုဝင်ဘာ ၁၅ ရက် နံနက် ၉ နာရီက ရန်ကုန်တိုင်း၊ ကမာရွတ်မြို့နယ်ရှိ မူလပဋ္ဌာန်းကျောင်းတိုက်မှာ ကျင်းပခဲ့ရာ အနုပညာရှင်များစွာ တက်ရောက်ခဲ့ပါတယ်။
“ဆရာတော်ကို သိက္ခာထပ် အလှူတော် မင်္ဂလာအနေနဲ့ အလှူလေးကျင်းပဖြစ်တာပါ။ ခုလို ကုသိုလ်ပြုရလို့လည်း အရမ်းကိုပီတိဖြစ်ရပါတယ်။ ကိုယ့်သူငယ်ချင်း အနုပညာအသိုင်းအဝိုင်းက တက်ရောက်လာလို့လည်း ပီတိဖြစ်ပါတယ်”လို့ မော်ဒယ်လ် Ella May က MT Entertainment ကို ပြောပါတယ်။
အဆိုပါအခမ်းအနားကို အနုပညာရှင်တွေဖြစ်တဲ့ ညိမ်းသော်၊ မေဂရေ့စ်၊ သဇင်ဦး၊ ခင်နန်းထိုက်၊ ပိုင်တံခွန်အဖေနဲ့ အမေ၊ မိတ်ကပ်ခင်စန်းဝင်း၊ မိတ်ကပ် Gucci Aung၊ မိတ်ကပ် ညီညီမောင်(စမ်းချောင်း)၊ ဒီဇိုင်နာ ရတု၊ သိန်းလင်းစိုး၊ စွမ်းထက်အောင်၊ ဩဂတ်စ်မိုးစတဲ့ သူတွေတက်ရောက်ခဲ့ပါတယ်။
အဲဒီနောက် မူလပဋ္ဌာန်းကျောင်းတိုက်မှာ သီတင်းသုံးတော်မူတဲ့ အရှင် သိရိ စန္ဒသူရိယမထေရ်ရဲ့ သိက္ခာတော်ထပ်ကံဆင့်ခြင်း အလှူမင်္ဂလာ၊ ဘုန်းဘုန်း တပည့် သားသမီးတို့ရဲ့ နိဗ္ဗာန်ကိုရည်မျှော်ပြီး “စုပေါင်းဘုံကထိန်သင်္ကန်းနဲ့ဆွမ်းအစရှိတဲ့ လှူဖွယ်ဝတ္ထု စတာတွေ ကပ်လှူခဲ့ကြပါတယ်။
