၁၃.၁၁.၂၀၂၄
Written By Thandar
သူငယ်ချင်းသံယောဇဉ် အချစ်ဇာတ်ကြမ်း အက်ရှင်ဇာတ်လမ်းပုံစံ “စာရိတ္တ ၂ ” ရုပ်ရှင်ဇာတ်ကားကြီးရဲ့ Premiere Show အခမ်းအနားကို နိုဝင်ဘာ ၁၂ ရက် ညနေ ၅ နာရီခွဲက ရန်ကုန်မြို့ သမ္မတအဆင့်မြင့် ရုပ်ရှင်ရုံမှာကျင်းပခဲ့ပါတယ်။
“စာရိတ္တ ၂ ရဲ့ ထူးခြားချက်က ၁ ရဲ့ဇာတ်အိမ်အဆက်ကို ပရိသတ်တွေ ထင်ထားတာထက် ပိုပြီးဇာတ်ရှိန်မြင့်မယ့်အခန်းတွေ အများကြီးပါတယ်။ ဇာတ်ဝင်ခန်းထဲမှာ ပါဝင်သူတွေအကုန်လုံးက အပြိုင်အဆိုင်ကျရာဇာတ်ရုပ်မှာ အကောင်းဆုံးလုပ်ဆောင်ထားတာမို့ ပရိသတ်တွေ ပိုသဘောကျလိမ့်မယ်လို့ မျှော်လင့်ပါတယ်” လို့ သရုပ်ဆောင် မေမြင့်မိုရ်က ပြောပါတယ်။
ဒီဇာတ်ကားကို ဇာတ်လမ်း ဇာတ်ညွှန်း ဒီဒီထက်အောင်ရေးသားပြီး ဒါရိုက်တာ စိုးမိုးမင်း ရိုက်ကူးကာ အကယ်ဒမီ နေဝင်း၊ မင်းဘုန်းမြတ်၊ တေဇလင်းရောင်၊ ချာလီ၊ အကယ်ဒမီ မေမြင့်မိုရ်၊ ထွန်းပုလဲရတနာ၊ ဝေလာရီ၊ ဥဩသံသာ၊ လှနုထွန်းတို့ ပါဝင်ထားကြပါတယ်။
“စာရိတ္တ ၂ မှာ ဇိုးဖြစ်အောင်လို့ နှုတ်ခမ်းမွှေးထားတာ မဟုတ်ပါဘူး။ အသည်းကွဲလို့ ထားထာပါ။ ဒီကားမှာ ခပ်ကြမ်းကြမ်းပုံစံပေါ့။ ကိုယ့်ရုပ်ကလည်း နုနေတော့လေ။ ပရိသတ်မြင်နေကြမဟုတ်တဲ့ ပုံစံလေးလည်း ဖြစ်သွားတာပေါ့။ သူငယ်ချင်းတစ်ယောက်နဲ့ တစ်ယောက်ချစ်ခြင်းတွေကို ဒီကားမှာမြင်တွေ့ရမှာပါ”လို့ သရုပ်ဆောင် ကောင်းမြတ်စံကပြောပါတယ်။
“စာရိတ္တ ၂ ” ရုပ်ရှင်ဇာတ်ကားကြီးကို လာမယ့် နိုဝင်ဘာ ၁၅ ရက်မှာ မြန်မာတစ်ပြည်လုံးရှိ အဆင့်မြင့်ရုပ်ရှင်ရုံတွေမှာ ရုံတင်ပြသမှာလည်းဖြစ်ပါတယ်။
