၁၁.၁၁.၂၀၂၄
Written By Thandar
ဂီတလမ်းကြောင်းပေါ်မှာ အောင်မြင်တစ်ခုရရှိနေတဲ့ အဆိုတော် ရော်ရွက်ရဲ့ သမီးချောလေးကို ယနေ့ နိုဝင်ဘာ ၁၁ ရက် ၁၁ နာရီ ၁၁ မိနစ်မှာ ကျန်းမာစွာနဲ့ ရန်ကုန်မြို့မှာ မွေးဖွားခဲ့တယ်လို့ ဆိုပါတယ်။
“အစထဲက အိမ်ထောင်ပြုပြီးကတည်းက သားသမီးလိုချင်ခဲ့တာပါ။ ခုလို သမီးလေးမွေးပြီးမို့လည်း တကယ်အရမ်းပျော်တယ်။ ခုတော့ သမီးလေးရော မိခင်ရောကျန်းမာပါတယ်။ သမီးလေးကတော့ ဒီနေ့ ၁၁ ရက် ၁၁ နာရီ ၁၁ မိနစ်မှာ မွေးတာပါ။ သမီးလေးက ၅ ပေါင် ၁၁ အောင်စ ရှိပါတယ်။ ကိုယ့်ဘဝထဲကို ဝင်လာတဲ့ သမီးလေးမို့ ချစ်မဝပါပဲ။ နှစ်ယောက်ထဲအတွက် မဟုတ်ဘူးမို့ အများကြီးကြိုးစားတည်ဆောက်ဖို့ ဆုံးဖြတ်ထားပါတယ်”လို့ အဆိုတော် ရော်ရွက်က MT Entertainment ကိုပြောပါတယ်။
သူနဲ့ မနှင်းနန္ဒာဖြိုးတို့ရဲ့ သမီးဦးလေးကတော့ ၅ ပေါင် ၁၁ အောင်စရှိပြီးတော့ ကျန်းမာစွာနဲ့ မွေးဖွားခဲ့တာလည်းဖြစ်ပါတယ်။
အဆိုတော်ရော်ရွက်က ချစ်သူကောင်မလေးနဲ့ သက်တမ်းတစ်နှစ်ကျော်မှာပဲ နှစ်ဦးသားက ရွှေလက်တွဲခဲ့ကြတာပါ။ အဆိုတော်ရော်ရွက်နဲ့ ချစ်သူတို့က အကြိုမင်္ဂလာပွဲကိုတော့ ၂၀၂၄ ခုနှစ် ဧပြီလ ၃၀ ရက်နေ့က ရန်ကုန်တိုင်း ကျောက်တန်းမြို့နယ်၊ စစ်တန်းကျေးရွာရှိ ရော်ရွက်ရဲ့နေအိမ်မှာ ကျင်းပခဲ့တာလည်းဖြစ်ပြီး မင်္ဂလာဧည့်ခံပွဲကြီးကိုတော့ မေလ ၁ ရက်နေ့မှာ ပြုလုပ်ခဲ့တာပါ။
အဆိုတော် ရော်ရွက်ကတော့ မိသားစုဘဝလေး ပိုပြီးပြည့်စုံဖို့အတွက် သားသမီးရတနာအနေနဲ့ နှစ်ယောက်လောက်ယူဖို့ အစီအစဉ်ရှိတယ်လို့လည်း သိရပါတယ်။
