၇.၁၁.၂၀၂၄
Written By Thandar
အောင်မြင်မှုများစွာရရှိခဲ့တဲ့ ” စာရိတ္တ” ရုပ်ရှင်ဇာတ်ကားကြီးရဲ့နောက်ဆက်တွဲ “စာရိတ္တ ၂” ရုပ်ရှင်ဇာတ်ကားကြီး Media Press Show ကို နိုဝင်ဘာ ၆ ရက် ညနေပိုင်းက ရန်ကုန်မြို့ ရွှေတိဂုံဘုရားတောင်ဖက်မုဒ် Happy Word ဝင်းရှိ The Rays Studio မှာ ပြုလုပ်ခဲ့ပါတယ်။
“ရှေ့မှာ အောင်မြင်ပြီးဇာတ်ကားမို့ ကျွန်တော်တို့တွေ သရုပ်ဆောင်ရတာ တာဝန်လည်းကြီးပါတယ်။ အကုန်လုံးလည်း သေချာအားစိုက်ပြီး ကြိုးစားရိုက်ကူးထားကြတယ်။ ဇာတ်ကားရဲ့ ဇာတ်အကောင်းဆုံးဖန်တီးထားပါတယ်။ ကြည့်ရတဲ့ ပရိသတ်တွေလည်း အကြိုက်တွေ့စေမှာပါ”လို့ ဒါရိုက်တာ စိုးမိုးမင်းကပြောပါတယ်။
အဆိုပါပွဲကိုတော့ စာရိတ္တ – ၂ ရုပ်ရှင်ဇာတ်ကားကြီးမှာပါဝင်ကြတဲ့ အနုပညာရှင်တွေဖြစ်တဲ့ ဒါရိုက်တာ စိုးမိုးမင်း၊ အကယ်ဒမီနေဝင်း၊ မင်းဘုန်းမြတ်၊ ချာလီ၊ ကောင်းမြတ်စံ၊ တေဇလင်းရောင်၊ ထွန်းပုလဲရတနာ၊ ဝေလာရီ၊ ဥသြသံသာတို့ တက်ရောက်ခဲ့ကြပြီးတော့ အမှတ်တရ ကိတ်ခွဲခဲ့ကြပါတယ်။
“ကျွန်တော်တို့တွေ ဒီကားအတွက် ပင်ပန်းမှုကတော့ ၁ ထက် ပိုပါတယ်။ မတူတာတွေက ရုံတင်တဲ့အခါကြရင် ကြည့်ကြည့်ပါလို့ ပြောချင်ပါတယ်။ မကြာခင် CANAL+ မှာလည်း “စာရိတ္တ” ၁ ရုပ်ရှင်ဇာတ်ကားကြီး ပြန်လည်ထုတ်လွှင့်ပြသမှာပါ။ ကျွန်တော်တို့ရဲ့ ရှေ့က စာရိတ္တကို ကြည့်ထားမှ ခုပြမယ့် ၂ နဲ့က အဆက်အစပ်ရှိမှာပါ။ နို့မို့ဆို ကြည့်ရတဲ့သူတွေက ဇာတ်ရည်လည်မှာမဟုတ်ပါဘူးလို့ ကြိုပြောချင်ပါတယ်” လို့ အကယ်ဒမီ နေဝင်းကပြောပါတယ်။
“စာရိတ္တ” ရုပ်ရှင်ဇာတ်ကားမှာ နေဝင်းက အလွှာမတူညီကြတဲ့ သူငယ်ချင်းတွေ တစ်ယောက်နဲ့တစ်ယောက် အနစ်နာခံပြီး သံယောဇဉ်ကြီးသူ မျိုးကျော်အနေနဲ့ ပါဝင်သရုပ်ဆောင်ထားကြပါတယ်။ သူတို့တွေရဲ့ ပီပြင်လှတဲ့ သရုပ်ဆောင်ကွက်တွေကြောင့်လည်း “စာရိတ္တ” ရုပ်ရှင်ဇာတ်ကားဟာ ၂၀၂၃ ခုနှစ်အတွင်း အအောင်မြင်ဆုံး ဇာတ်ကားတစ်ကား ဖြစ်ခဲ့ပါတယ်။
စာရိတ္တ ၂ ရုပ်ရှင်ဇာတ်ကားကြီးကိုတော့ လာမယ့် နိုဝင်ဘာ ၁၅ ရက်မှာ မြန်မာတစ်ပြည်လုံးရှိ အဆင့်မြင့်ရုပ်ရှင်ရုံတွေမှာ ရုံတင်ပြသမှာလည်းဖြစ်ပါတယ်။
