၄.၁၁.၂၀၂၄
Written By Thandar
Horror Comedy ဇာတ်လမ်းပုံစံ “ဘောက်ချာ” ရုပ်ရှင်ဇာတ်ကားကြီး Premiere Show ပွဲကို ယနေ့ နိုဝင်ဘာ ၄ ရက် ညနေပိုင်းက ရန်ကုန်မြို့ ဒဂုံမြို့နယ်ရှိ သမ္မတအဆင့်မြင့်ရုပ်ရှင်ရုံမှာ ကျင်းပခဲ့ပါတယ်။
“ကျွန်တော်က ဒီဘောက်ချာ ဇာတ်ကားမှာ ထက်ကောင်းဆိုတဲ့ ကာရိုက်တာနဲ့ သရုပ်ဆောင်ရတယ်။ ဇာတ်လိုက်မြင့်မြတ်ရဲ့ သူငယ်ချင်းပေါ့။ ဒီကားက ပြင်ဦးလွင်၊ ရန်ကုန် ၂ နေရာမှာ ရိုက်ထားတာပါ။ ညပိုင်းတွေ ရိုက်ရတဲ့ ဇာတ်ဝင်ခန်းတွေပါတော့ တော်တော်လေး ပင်ပန်းကြတယ်။ ဦးခင်လှိုင်နဲ့ဇာတ်လိုက်တို့က နားချင်တဲ့ အချိန် ညဘက်ရိုက်ရင် စိတ်ညစ်တာပေါ့။ ညဘက်ရိုက်ခဲ့တဲ့ ဇာတ်ဝင်ခန်းတွေက တော်တော်ကောင်းပါတယ်။ ဒီကားက အချစ်ဟာသသရဲကားပေါ့။ ပရိသတ်ကြိုက်နှစ်သက်တဲ့ကားဖြစ်မှာပါလို့ ပြောချင်ပါတယ်” လို့ သရုပ်ဆောင် ခင်လှိုင်က ပြောပါတယ်။
ဒီဇာတ်ကားရဲ့ ဇာတ်လမ်း ဇာတ်ညွှန်းကို သက်ဦးမောင်က ရေးသားထားပြီးတော့ အနုပညာအကြံပေးအနေနဲ့ နေသူရိန်၊ Dop မင်းမင်းကျော်၊ ဒါရိုက်တာ စိုးမိုးမင်းက သရုပ်ဆောင်တွေဖြစ်တဲ့ မြင့်မြတ်၊ မင်းဘုန်းမြတ်၊ ခြူးလေး၊ ခြူးစစ်ဟန်၊ လှနုထွန်း၊ ချိုမဒီသွင်၊ အရိုင်း၊ ခင်လှိုင်၊ ဆင်မ၊ မိုးမိုး၊ မာမီသက်၊ သွက်လက်၊ ဟန်နီဇော်၊ ဒဲ့ဒိုး၊ ဇော်ထိုး၊ ပေါ်လာ၊ မျိုးမျိုးခိုင် စတဲ့သူတွေနဲ့ ရိုက်ကူးထားပါတယ်။
“ခြူးစစ်က ဘောက်ချာဇာတ်ကားမှာ စုစန္ဒီဆိုတဲ့ ကာရိုက်တာနဲ့ ပါဝင်ထားပါတယ်။ ဒီကားကတော့ ခြူးဘဝအတွက် ဒုတိယမြောက် ရုပ်ရှင်ဇာတ်ကားကြီးပါ။ ပထမဦးဆုံးအနေနဲ့ ဝါရင့်သရုပ်ဆောင်တွေဖြစ်တဲ့ ဦးခင်လှိုင်၊ ကိုမြင့်မြတ် စတဲ့ Actor အကြီးတွေနဲ့ ဆုံရတယ်။ အမှတ်တရတွေက အများကြီးရှိတယ်။ ခြူးကတော့ ဦးခင်လှိုင်နဲ့အတွဲပုံစံလေးဆိုတော့ အမှတ်ရစရာတွေများပါတယ်။ ကိုယ်လည်း လုပ်ကွက်လည်း ရတယ်လို့လည်း ပြောလို့ရပါတယ်။ ဟာသလေးရော ၊ အပျော်တွေအပြင် သရဲခြောက်တာတွေလည်း ပရိသတ်တွေ သဘောကျကြမယ် လို့ထင်ပါတယ်”လို့ သရုပ်ဆောင် ခြူးစစ်ဟန်က ပြောပါတယ်။
“ဘောက်ချာ” ရုပ်ရှင်ဇာတ်ကားကြီးကို လာမယ့် နိုဝင်ဘာ ၈ ရက်မှာ မြန်မာတစ်ပြည်လုံးရှိ အဆင့်မြင့် ရုပ်ရှင်ရုံတွေမှာ ရုံတင်ပြသမှာဖြစ်ပါတယ်။
