၄. ၁၁. ၂၀၂၄
Written by Nay Moe
ချင်းပြည်နယ်၊ တီးတိန်မြို့နယ်မှာ အခြေစိုက်လှုပ်ရှားနေတဲ့ PDF-Zoland ရဲ့ လက်နက်ကြီးပိုင်းတာဝန်ယူထားတဲ့ ဒုတပ်စိတ်မှူးဟာ ဒီနေ့ မနက်ပိုင်း ၇ နာရီ ဝန်းကျင်က ရုတ်တရက် သေဆုံးသွားတယ်လို့ PDF-Zoland က ထုတ်ပြန်ထားပါတယ်။
PDF-Zoland က ဒုတပ်စိတ်မှူး အသက် ၄၀ အရွယ် ပေါင်ခန့်ခိုင် (ခ) ကိုစစ်သားဟာ နေမကောင်းတာကြောင့် တစ်လ နီးပါး ဆေးကုသမှုခံယူနေရပေမဲ့ ဆေးဝါး မလုံလောက်မှု၊ ထိရောက်စွာကုသနိုင်မှုမရရှိတာကြောင့် မီဇိုရမ်ပြည်နယ်ဘက် ဆေးဝါးကုသဖို့ သွားရောက်နေချိန် အိန္ဒိယ-မြန်မာနယ်စပ် တီအိုချောင်းမှာ သေဆုံးသွားတာပါ။
သေဆုံးသူ ကိုစစ်သားဟာ အရင်က တပ်မှာ လက်နက်ကြီး ကြီးကြပ်တာဝန်ယူထားသူဖြစ်ပြီး နွေဦးဖြစ်စဥ် ဖြစ်ပွားအပြီး CDM လှုပ်ရှားမှုမှာ ပါဝင်ကာ PDF-Zoland ရဲ့ လက်နက်ကြီးပိုင်းတာဝန်ယူ ထမ်းဆောင်သူ ဒုတပ်စိတ်မှူးဖြစ်လာတယ်လို့လည်း ဒေသတွင်းသတင်းတွေမှာ ဖော်ပြထားပါတယ်။
