၂၈.၁၀.၂၀၂၄
Written by KL
ရှမ်းပြည်နယ်(တောင်ပိုင်း)၊ အောင်ပန်းမြို့အဝင်၊အောင်ပန်း – ကလောလမ်း တောင်ရိုးစာပေနှင့်ယဥ်ကျေးမှုရုံးဘေး မယ်ခိုတောင်အတက်လမ်း၌ သားအမိနှစ်ဦးကို ရိုက်နှက်လုယက်ကာ သတ်ဖြတ်မှုမှ ကျုးလွန်ခဲ့သော အမျိုးသား နှစ်ဦးကို မိတ္ထီလာမြို့နယ်တွင် အောက်တိုဘာ ၂၆ရက်က ဖမ်းမိခဲ့ကြောင်း ဒေသခံများထံမှ သိရသည်။
အဆိုပါဖြစ်စဥ်မှာ အောက်တိုဘာလ ၂၄ ရက် နံနက်ပိုင်းက အောင်ပန်းမြို့အဝင်၊ အောင်ပန်း- ကလောလမ်း တောင်ရိုးစာပေနှင့် ယဥ်ကျေးမှုရုံးဘေး မယ်ခိုတောင်အတက်လမ်းတွင် ဆိုင်ကယ်ရပ်၍ နားနေသော သားအမိနှစ်ဦးကို အမျိုးသားနှစ်ဦးက ကျောက်ခဲထည့်ထားသော လွယ်အိတ်ဖြင့် ရိုက်နှက်ပြီး ဆိုင်ကယ်နှင့် ရွှေ ထည်ပစ္စည်းများကို လုယူခဲ့ခြင်းဖြစ်သည်။
ရိုက်နှက်ခံရသော အသက် ၄၆ နှစ်အရွယ် မိခင်ဖြစ်သူ ဒေါ်နီလာထွေးမှာ ရရှိသော ဦးခေါင်းနောက်စေ့နှင့် နဖူး ဒဏ်ရာတို့ဖြင့် သေဆုံးခဲ့ပြီး သားဖြစ်သူ အသက် ၂၀ ကျော်အရွယ် ကိုဟန်မြင့်ကျော်တွင် ဦးခေါင်းနောက်စေ့ပေါက်ပြဲဒဏ်ရာများ ရရှိခဲ့သည့်ဖြစ်စဥ်ဖြစ်သည်။
“ကျုးလွန်တဲ့ နှစ်ယောက်လုံးကို မိတ္ထီလာမှာ ပြန်မိတာ။လူလတ်ပိုင်းတွေလို့ သိရတယ်။ ဆိုင်ကယ်ကိုလည်း ပြန်ရတယ်။ အောင်ပန်းမှာ ရိုက်နှက်ပြီး ပစ္စည်းလု လူသတ်တာ တစ်ခါမှမကြားဖူးဘူး “ဟု အောင်ပန်းဒေသခံတစ်ဦးက ပြောသည်။
ဖမ်းမိသူနှစ်ဦးကို မိတ္ထီလာမြို့နယ်မှ သွားရောက်ခေါ်ဆောင်ခဲ့ပြီး အောင်ပန်းမြို့မရဲစခန်းတွင်ဖမ်းဆီးကာ အမှုဖွင့် စစ်ဆေးလျက်ရှိကြောင်းလည်း သိရသည်။
