၂၈.၁ဝ.၂ဝ၂၄
Written by K Pyay Thein
ဂျစ်ကားစီးဖူးသလား “ဂျားကစ် စာဘူးသရီး” ရုပ်ရှင်ဇာတ်ကားကို ရှုတ်ချသူ ကိုဟာဆယ်ယွန်ဟာ အခုရက်ပိုင်းအတွင်းမှာ ပျောက်ဆုံးသွားခဲ့တယ်လို့ သူရဲ့မိသားစုအသိုင်းအဝိုင်းက ထုတ်ဖော်ပြောကြားလာပြီး ကိုဟာဆယ်ယွန်ကို တွေ့ရှိပါက မိသားစုဝင်တွေထံအကြောင်းကြားပေးဖို့ Facebook လူမှုကွန်ရက်မှာ အကူအညီတောင်းခံတဲ့ ပို့စ်တစ်ခုကိုလည်း မိသားစုဝင်တွေဘက်က ရေးသားဖော်ပြလာခဲ့ပါတယ်။
ပျောက်ဆုံးနေသူရဲ့မိသားစုဝင်တွေ ပြောကြားချက်အရ အခုရုပ်ရှင်နဲ့ပတ်သက်လို့ အောက်တိုဘာ ၂၄ ရက်နေ့မှာ ကိုဟာဆယ်ယွန်က Social Media မှာ စတင်ရှုတ်ချခဲ့ပြီး အကြောင်းရင်းကတော့ ဇာတ်ကားနာမည် ဇာတ်ကားထဲဝတ်ဆင်ထားတဲ့ ဟိန္ဒူရိုးရာဝတ်စုံတို့က ရိုးရာယဥ်ကျေးမှုကို ပျက်ရယ်ပြုစော်ကားသလိုဖြစ်နေတယ်လို့ ရှုတ်ချထားခဲ့တာဖြစ်ပါတယ်။
“ဇာတ်ကားထဲ သုံးနှုန်းထားတဲ့စကားလုံးအသုံးနှုန်းတွေက ကျွန်တော်တို့ မသိရသေးပါဘူး။ အခု ရုပ်ရှင်လိုမျိုး အရင်တုန်းကလည်း တခြားလူမျိုး၊ တခြားဘာသာယဥ်ကျေးမှု လူလူချင်းခွဲခြားဖိနှိပ်တာတွေ အရံမင်းသားမင်းသမီးတွေဆို အသားမဲတာ၊ ပုတာတွေ တစ်ပါးသူအားနည်းချက်ကိုဖိတာ၊ အိမ်အကူနေရာဆို တောက မိန်းကလေးတွေပဲလုပ်တယ်ဆိုတဲ့ လော့ဂျစ်ရိုက်သွင်းတာ လူကြမ်းဆိုသူများက သူများသားမယားကိုဖျက်ဆီးရမယ်ဆိုတာ လော့ဂျစ်တစ်ခုလိုဖြစ်လာတာ။ မြန်မာ့ရုပ်ရှင်မှာ ပြုပြင်မယ်ဆိုပြုပြင်စရာတွေ အများကြီးပါ။ တခြားဘာသာလူမျိုးကိုစော်ကားပြီးမှ ဟာသဆိုတဲ့စကားလုံးနဲ့ကာတာကို ကျွန်တော့်လိုပဲ လက်မခံနိုင်သူတွေရှိပါတယ်။ အဲ့ထဲကမှ ကိုဟာဆယ်ယွန်လည်းပါဝင်ပါတယ်”လို့ ပျောက်ဆုံးနေသူ ကိုဟာဆယ်ယွန်ရဲ့မိတ်ဆွေဖြစ်သူက သူရဲ့ Facebook လူမှုကွန်ရက်စာမျက်နှာပေါ်မှာရေးသားထားခဲ့တာဖြစ်ပါတယ်။
ကိုဟာဆယ်ယွန်ဟာ ပြီးခဲ့တဲ့ ရက်ပိုင်းအတွင်းက သူ့ဆီကိုဖုန်းတစ်လုံးဝင်လာလို့ ဖုန်းပြောမယ်ဆိုပြီး အဲ့ဒီနေ့ နေ့လယ် ၁ နာရီကျော်လောက်ကစပြီး ပြန်မလာတော့တာဖြစ်သလို အဲ့ဒီညက ညပိုင်းအထိ အင်တာနက်သုံးတာကိုတွေ့ရသော်လည်း အဲ့ဒီနောက်မှာတော့ သူ့လက်ကိုင်ဖုန်းပါ စက်ပိတ်သွားခဲ့တာဖြစ်တယ်လို့ ဆိုပါတယ်။
“ရုတ်တရက်ကြီး ပျောက်သွားတာပါ။ သူ့ကို တစ်နေရာရာမှာတွေ့ရှိရင် မိသားစုအသိမိတ်ဆွေတွေ စိတ်ပူနေကြောင်းပြောပြီး ထိန်းသိမ်းထားပေးကြပါ”လို့ ကိုဟာဆယ်ယွန်ရဲ့မိသားစုအသိုင်းအဝိုင်းတွေဘက်က မေတ္တာရပ်ခံထားပါတယ်။
သို့သော်လည်း ယခုပျောက်ဆုံးနေသူ ကိုရှိုင်းထက်အောင်(ခ) ဟာဆယ်ယွန်ဟာ သူ့ဘာသာသူပျောက်ဆုံးနေတာဖြစ်နိုင်သလို နာမည်ကြီးမင်းသား၊ မင်းသမီး၊ ဒါရိုက်တာတွေက ဒီကားလောက်နဲ့ လူတစ်ယောက်ကို သူတို့သိက္ခာထိအောင်မလုပ်လောက်ဘူးလို့လည်း ရုပ်ရှင်အသိုင်းအဝိုင်းနဲ့ နီးစပ်သူ ပြည်သူတစ်ဦးက မှတ်ချက်ပြု ပြောကြားထားပါတယ်။
“မင်းသား၊ မင်းသမီးတွေအားလုံးကလည်း ငွေရပြီးသားလေ။ ပြီးတော့ တကယ်ထိမဲ့ ဒီကားထုတ်လုပ်သူကလည်း အခုကားသိန်း ၁၀၀၀ လောက်ရှုံးလည်း သိန်းသောင်းပေါင်းများစွာချမ်းသာလို့ လူမသိသူမသိ လူတစ်ယောက်လောက်နဲ့ အာရုံနောက်ခံမှာမဟုတ်ပါဘူး”လို့ မှတ်ချက်ပြုထားတာဖြစ်ပါတယ်။
လူမှုနယ်ပယ်မှာ ပျံ့နှံ့နေပြီး မကြာခင် ရုံတင်မယ့် “ဂျားကစ် စာဘူးသရီး” ရုပ်ရှင်ကားနဲ့ စပ်လျဉ်းလို့ အိန္ဒိယနွယ်ဖွား ဟိန္ဒူဘာသာ၀င်တွေရဲ့ထင်မြင်ယူဆချက်တွေအရ အခုရုပ်ရှင်ဟာ လူမျိုးတစ်စုကို ဟာသအနေနဲ့ ခုတုံးလုပ်ထားခြင်းဖြစ်တဲ့အတွက် အထူးစိတ်ပျက်ဖွယ်ကောင်းပြီး ရုပ်ရှင်ရိုက်ကူးတဲ့အခါမှာ သုံးနှုန်းတဲ့ အသုံးနှုန်းတွေက ဘယ်လူမျိုးစုကိုမှ မထိခိုက်ဘဲ၊ ခွဲခြားမှုမရှိဘဲ ဟဿရသ ရအောင်သာ ရိုက်ကူးစေချင်တယ်လို့ ဆိုထားပြီး ရိုးရာ၊ ယဉ်ကျေးမှု၊ လူမျိုးရေးဟာ ပျက်ရယ်ပြုစရာမဟုတ်တဲ့အတွက် ဟာသတစ်ခုလုပ်ထားခြင်းဟာ လူမျိုးစုတစ်ခုလုံးကို နှိမ့်ချခြင်းဖြစ်တယ်လို့သာ ယူဆတယ်လို့ ဟိန္ဒူဘာသာရေး အသိပညာပေး အဖွဲ့အစည်းတစ်ခုကလည်း ကန့်ကွက်ရှုတ်ချထားပါတယ်။
Photo – Chllista (Facebook)
