၁၂.၁ဝ.၂၀၂၄
Written by K Pyay Thein
လမ်းပန်းဆက်သွယ်ရေးအခက်အခဲကြောင့် ဘားအံ – မြဝတီကားခဟာ ခရီးသည်တစ်ဦး ကျပ် ၇၀၀၀၀ အထိ စျေးနှုန်းမြင့်တက်လာတယ်လို့ ခရီးသွားပြည်သူတွေထံကနေ သိရပါတယ်။
“အခုက ဘယ်လိုဖြစ်လဲဆိုရင် လမ်းသစ်ဘက်က တိုက်ပွဲတွေရှိနေတော့ သွားလို့မရဘူး။ လမ်းဟောင်းဘက်တွေကနေ သွားရတယ်။ ကျုံဒိုးဘက်တွေ ထော့ကို့ကိုးတောလမ်းဘက်တွေကနေ သွားရတယ်။ တစ်ခါတလေ လမ်းမှာ ညအိပ်ရတာတွေရှိတယ်။ အခုက မိုးတွင်းကာလဆိုတော့ လမ်းပန်းဆက်သွယ်ရေးက အတော်လေးခက်ခဲနေတာတွေ ရှိပါတယ်။ လမ်းဟောင်းကသွားရင် တစ်ခါတလေ ၂၄ နာရီအတွင်းရောက်တယ်။ တစ်ခါတလေ ၄၈ နာရီအတွင်းရောက်ပါတယ်” လို့ ဘားအံဒေသခံ ခရီးသွားဝန်ဆောင်မှုလုပ်ငန်း လုပ်ကိုင်သူတစ်ဦးက ပြောပါတယ်။
လက်ရှိကာလ ကော့ကရိတ်နဲ့ မြ၀တီဒေသမှာ ဒေသတွင်းတိုက်ပွဲတွေကြောင့် လမ်းပန်းဆက်သွယ်ရေးအပိုင်းမှာ အခက်
အခဲတွေရှိနေတာဖြစ်ပါတယ်။
“အရင်ကဆို ကော့ကရိတ်-မြဝတီက လမ်းသစ်ကသွားရင် ခဏပဲလေ။ နာရီပိုင်းပဲ ကြာပါတယ်။ အခုက အခြေအနေအကြောင်းအမျိုးမျိုးကြောင့် လမ်းဟောင်းဘက်ကပဲ သွားနေရတော့ အချိန်တွေပိုကြာသွားသလို ကားခတွေလည်းပိုတက်လာတဲ့သဘောပါ”လို့ မြ၀တီမြို့ ဒေသခံတစ်ဦးက ဆက်ပြီးပြောပါတယ်။
အခုလက်ရှိ ဘားအံ – မြဝတီကားခဟာ ခရီးသည်တစ်ဦးကို ကျပ် ၇၀၀၀၀ ကနေ ကျပ် ၈၀၀၀၀ ကြားလောက်ဈေးရှိနေတာလည်း ဖြစ်ပါတယ်။
Photo – CJ
ပုံစာ – ဒေါနတောင် မြဝတီ လမ်းပိုင်းတစ်နေရာအားတွေ့ရစဉ်။
