၁၁.၁၀.၂၀၂၄
Written by KL
ရန်ကုန်-မန္တလေးအမြန်လမ်းမကြီး၊ မိုင်တိုင်အမှတ်၂၃၄/၅ နှင့် ၂၃၄/၆ အကြားတွင် ယနေ့ အောက်တိုဘာလ ၁၁ ရက် နံနက် ၄ နာရီ ၄၅ မိနစ်ခန့်က ခရီးသည် ၂၅ ဦးလိုက်ပါလာသော နယူးမန္တလာထွန်း ခရီးသည်တင်ယာဥ်တစ်စီးမှာ နောက်ဘီးပေါက်၍ အမြန်လမ်းပေါ် တိမ်းမှောက်မှုဖြစ်ပွားခဲ့ရာ ခရီးသည် ၅ ဦးထိခိုက်ဒဏ်ရာရရှိခဲ့ကြောင်း အမြန်လမ်းမီးသတ်စခန်းထံမှ သိရသည်။
ယာဥ်တိမ်းမှောက်မှုကြောင့် အသက် ၁၉ နှစ်မှ အသက် ၃၈ နှစ်အရွယ်ကြားရှိ အမျိုးသမီး ၁ ဦးနှင့် အမျိုးသား ၄ ဦးတို့မှာ ထိခိုက်ဒဏ်ရာရရှိခဲ့သော်လည်းအသက်အန္တရာယ် စိုးရိမ်ဖွယ်ရာမရှိကြောင်း သိရသည်။
“ထိခိုက်ဒဏ်ရာရတဲ့ ခရီးသည်တွေက ရန်ကုန်ကပါ။ ပွန်းပဲ့ပေါက်ပြဲဒဏ်ရာတွေ၊ နာကျင်ဒဏ်ရာတွေ ရခဲ့တာပါ။ ဒဏ်ရာရသူတွေကို နေပြည်တော်ကုတင်(၁၀၀၀)ပြည်သူ့ဆေးရုံကြီးကို ပို့ဆောင်ထားပါတယ်”ဟု အမြန်လမ်း မီးသတ်တပ်ဖွဲ့ဝင်တစ်ဦးက ပြောသည်။
ခရီးသည်တင်ယာဥ်တိမ်းမှောက်မှုကြောင့် ခရီးသည်တင်ယာဥ်၏ အရှေ့လေကာမှန်ကွဲကာ ဘယ်နောက်ကြည့်မှန်လည်း ကွဲအက်ခဲ့ကြောင်း သိရသည်။
ခရီးသည်တင်ယာဥ်မောင်းမှာ ထွက်ပြေး တိမ်းရှောင်သွားသည််ဟု သိရပြီး ယာဥ်မောင်းကို ဘုရားတောင်အမြန်လမ်းရဲစခန်းက ပုဒ်မ ၃၃၈၊ ၃၃၇၊ ၂၀၂ဖြင့် အမှုဖွင့်ကာ စစ်ဆေးနေကြောင်း သိရသည်။
