၁၀.၁ဝ.၂၀၂၄
Written by K Pyay Thein
ကရင်ပြည်နယ်၊ မြဝတီမြို့နယ်ရှိ မြဝတီ- ကော့ကရိတ် ဒေါနတောင်ကျော် လမ်းဟောင်းမှာ လူစီးယာဉ် အပါအဝင် ကုန်စည်ပို့ဆောင်ရေး မော်တော်ယာဉ်တွေကို လမ်းကြေးနဲ့ မြို့ဝင်ကြေးတွေ အခုနှစ်ဇွန်လက စတင်လို့ တိုးမြင့်ကောက်ခံလာပြီးနောက်မှာ ခရီးသည်တင် ယာဥ်စီးခနှုန်းထားတွေ ဒီနေ့ကာလအထိ အဆမတန် မြှင့်တက်လာနေတယ်လို့ မြဝတီမြို့ဒေသခံတွေက ပြောပါတယ်။
လက်ရှိမှာ ရန်ကုန်-မြဝတီကားခက ခရီးသည်တစ်ဦး ငွေကျပ် ၁၅ဝဝဝဝ ကနေ ကျပ် ၂ဝဝဝဝဝ အထိ ပေါက်ဈေးရှိနေတာဖြစ်တယ်လို့လည်း သိရပါတယ်။
“ဒေါနတောင်ကျော်လမ်းဟောင်းက ကုန်စည်ပို့ဆောင်ရေး မော်တော်ယာဥ်ဖြတ်သန်းခ မြို့ဝင်ကြေး တိုးမြှင့်ကောက်ခံလာတယ်။ အဲဒီနောက်မှာ ခရီးသည်တင် မော်တော်ယာဥ်တွေကလည်း ယာဥ်စီးခတွေ အဆမတန် တိုးမြင့်တောင်းခံလာကြတယ်။ ရန်ကုန်ကနေ မြဝတီလာတာ ယာဥ်စီးခ ကျပ် ၂၂၀၀၀၀ ကုန်ကျခဲ့ပါတယ်။ အရင်ကဆို ၁၃၀၀၀၀ ပဲ ပေးရတာပါ။ ဒီအတိုင်းဆိုရင် ရန်ကုန်ပြန်လာဖို့ မလွယ်တော့ပါဘူး”လို့ ဒေသခံတစ်ဦးက ပြောပါတယ်။
အဆိုပါ မြဝတီ – ကောကရိတ် ဒေါနတောင်ကျော်လမ်းဟောင်းမှာ ကုန်တင်ယာဉ်တွေလည်း မြို့ဝင်ကြေး၊ ဂိတ်ကြေးကုန်ကျစရိတ် သိန်းဆယ်ဂဏန်းအထက်ရှိနေတယ်လို့ ကုန်တင်ယာဥ်မောင်းတွေက ဆိုပါတယ်။
ဒါ့အပြင် လက်ရှိ မြဝတီ – ရန်ကုန် ခရီးသည်တင် ပို့ဆောင်ရေးမော်တော်ယာဉ်ဂိတ် အချို့လည်း ပိတ်ထားဆဲဖြစ်ပါတယ်။
“ဘားအံ-မြဝတီလမ်း လက်ရှိအခြေနေက တချို့နေရာတွေ အရမ်းဆိုးလွန်းတယ်။ ရန်ကုန်ကနေ မြဝတီရောက်တဲ့အထိ အစစ်အဆေး အရမ်းများပါတယ်။ ၁၃/မှတ်ပုံတင်ကိုင်ထားတဲ့သူတွေနဲ့ တရုတ်တွေကို သွားလာခွင့်ပိတ်ထားတယ်လို့လည်း ကြားရပါတယ်။ တချို့နေရာတွေမှာတော့ တောင်းကြေးက အတော်လေးကြမ်းတယ်”လို့ အမည်မဖော်လိုသူ ခရီးသွားတစ်ဦးက ပြောပြပါတယ်။
ထို့ကော်ကိုး-မြဝတီလမ်းမှာ ဇွန်လ ၁ ရက်နေ့ကစလို့ ယာဉ်ဖြတ်သန်းခ တိုးမြင့်ကောက်ခံလျက်ရှိရာမှာ ကားသေးအိမ်စီးကားအတွက် လိုင်စင်ကားအဖွဲ့စုံဂိတ်မှာ တစ်စီး ၃၀၀၀၀ ကျပ်၊ လတ်မှတ်ဂိတ်မှာ ၃၀၀၀၀ ကျပ်၊ လိုင်စင်မဲ့ကားအဖွဲ့စုံဂိတ်မှာ ၅၀၀၀၀ ကျပ်၊ လက်မှတ်ဂိတ်မှာ ၅၀၀၀၀ ကျပ် ပေးဆောင်နေရတယ်လို့ ဒေသခံကားဆရာတွေက ပြောပါတယ်။
“ကားလတ် Voxy , Starex , အံစာတုန်းဆို ကုန်နဲ့ လူဦးရေပေါ်မူတည်ပြီး ဈေးနူန်းသတ်မှတ်ထားတယ်။ လိုင်စင်ကားက အဖွဲ့စုံဂိတ်ဆို ၁၀၀၀၀၀ ကနေ ၂၀၀၀၀၀ ၊ လက်မှတ်ဂိတ်ဆို ၅၀၀၀၀ ကနေ ၈၀၀၀၀ ၊ လိုင်စင်မဲ့ကားက အဖွဲ့စုံဂိတ်ဆို ၁၅၀၀၀၀ ကနေ ၃၀၀၀၀၀ အထိဈေးရှိပါတယ်။ လက်မှတ်ဂိတ်ဆို ၅၀၀၀၀ ကနေ ၁၀၀၀၀၀ ပေးရပါတယ်။ ကားကြီးဆို ( ၁၈ ပေ၊ ၁၄ ပေ၊ ၁၀ ပေ Light Truck, Hijet )ကုန်နဲ့ လူဦးရေပေါ်မူတည်ပြီးတော့ ဈေးနူန်းသတ်မှတ်ထားတယ်။ အဲ့ဒီ ဂိတ်ကြေးက နှစ်သိန်းကနေ လေးသိန်းလောက်အထိရှိနေတယ်။ ဒါကလမ်းမှာပေးရတဲ့ ဂိတ်စခန်းငယ်ကြေးတွေမပါသေးပါဘူး”လို့ ခရီးသွားဝန်ဆောင်မှုလုပ်ငန်းအေးဂျင့် တစ်ဦးက ပြောပြခဲ့ပါတယ်။
ISP Myanmar ကတော့ မကြာသေးမီရက်ပိုင်းအတွင်းက ဒီ မြဝတီဘက်သွားရာ ဒေါနတောင်ဖြတ် တောလမ်းတွေကို ထိန်းချုပ်ထားတဲ့ KNU / KNLA အပါအဝင် ကရင်လက်နက်ကိုင်အဖွဲ့တွေက ဆက်ကြေး/ လမ်းကြေးကောက်ခံမှုတွေကတစ်ဆင့် တစ်လပျမ်းမျှ မြန်မာကျပ်ငွေ သိန်းပေါင်းလေးသောင်းဝန်းကျင်အထိ ရရှိနေတယ်လို့ ထုတ်ဖော်ရေးသားဖော်ပြထားပါတယ်။
Photo – CJ
