၈.၁၀.၂၀၂၄
Written by KL
ရန်ကုန်-မန္တလေးအမြန်လမ်းမကြီး၊ မိုင်တိုင် အမှတ် ၂၅၆/၆နှင့် ၂၅၆/၇ကြားတွင် အောက်တိုဘာလ ၇ ရက် ည ၁၁ နာရီ ၅၀ မိနစ်ခန့်က အရိန္ဒမာ Express ခရီးသည်တင်ယာဥ်တစ်စီး မီးလောင်မှုဖြစ်ပွားခဲ့ကြောင်း အမြန်လမ်းမီးသတ်စခန်းထံမှ သိရသည်။
ခရီးသည်တင်ယာဥ်ပေါ် အမျိုးသား ၄ ဦး၊ အမျိုးသမီး ၆ ဦးလိုက်ပါလာသော အရိန္ဒမာ Express ခရီးသည်တင်ယာဥ်မှာ ဘရိတ်ရှူးကပ်၍ ယာဥ်၏ နောက်ပိုင်းညာဘက်တာယာ၂လုံးသို့ မီးကူးစက်လောင်ကျွမ်းခဲ့ခြင်းဖြစ်ကြောင်း စစ်ဆေးသူများ၏ အတည်ပြုချက်အရ သိရသည်။
“ခရီးသည်တင်ကားမှာ ကားဘီး၂ လုံးပဲ မီးလောင်ဆုံးရှုံးခဲ့တယ်။ ခရီးသည်တွေနဲ့ ယာဥ်မောင်းတွေကို ထိခိုက်ဒဏ်ရာရတာတွေမရှိပါဘူး”ဟု အမြန်လမ်း မီးသတ်စခန်းမှ တပ်ဖွဲ့ဝင်တစ်ဦးက ပြောသည်။
ခရီးသည်တင်ယာဥ်မီးလောင်မှုကြောင့်အသက် ၃၅ နှစ်အရွယ် ယာဥ်မောင်းအမျိုးသားကို ရာဇသတ်ကြီး ပုဒ်မ ၂၈၅ ဖြင့် ပေပင်လေးအမြန်လမ်းရဲစခန်းက အမှုဖွင့်ထားကြောင်း သိရသည်။
