တိုင်ဖွန်း ခရာတွန် ခေါ် တိုင်ဖွန်း ဂျူလီယံက တိုင်ဝမ်ကျွန်းအား စူပါတိုင်ဖွန်း အဖြစ်ဖြတ်သန်းရန် ဦးတည် ရွေ့လျားနေ

၃၀. ၉. ၂၀၂၄
Translated by Htwe Ko Tun

ဖိလစ်ပိုင်နိုင်ငံမြောက်ပိုင်း လူဇုန်ရေလက်ကြားကိုဖြတ်သန်းသွားခဲ့သောကြောင့် ဖိလစ်ပိုင်နိုင်ငံတစ်ဝန်း မိုးသည်းထန်စွာရွာသွန်းစေခဲ့သော တိုင်ဖွန်းခရာတွန်ကစက်တင်ဘာလ ၃၀ ရက်မွန်းလွဲပိုင်းတွင်မူ ဖိလစ်ပိုင်ပင်လယ်မှ တိုင်ဝမ်ကျွန်းဆီသို့ ဦးတည်ရွေ့လျားလျက်ရှိကြောင်း သိရသည်။

တိုင်ဖွန်းခရာတွန်က အနောက်ဘက်သို့ ဖြည်းညှင်းစွာရွေ့လျားနေရာမှ အောက်တိုဘာလ ၁ ရက်တွင် အလွန်အားကောင်းသော စူပါတိုင်ဖွန်းအဆင့်သို့ရောက်ရှိလာချိန်တွင် အရှေ့မြောက်ဘက်သို့ ရုတ်တရက်ကွေ့၍ တိုင်ဝမ်ကျွန်းဆီသို့ ဦးတည်ရွေ့လျားလိမ့်မည်ဟု ခန့်မှန်းထားသည်။

စူပါတိုင်ဖွန်းက အဓိကဆိပ်ကမ်းမြို့ဖြစ်သော Kaohsiung အပါအဝင် လူဦးရေထူထပ်သော တိုင်ဝမ် ကျွန်းအနောက်ဘက်ကမ်းရိုးတန်းဒေသကိုဖြတ်၍ အောက်တိုဘာလ ၂ ရက်၊ ဗုဒ္ဓဟူးနေ့ မွန်းလွဲပိုင်းတွင် ကုန်းတွင်းဝင်ရောက်မည်ဟု ခန့်မှန်းရသည်။

စက်တင်ဘာလ ၃၀ ရက် နံနက်တွင် တိုင်ဝမ်ကျွန်း၌ ရာသီဥတုသတိပေးချက်များထုတ်ပြန်ထားပြီး အား ကောင်းလှသော စူပါတိုင်ဖွန်းက ကျွန်း၏အနောက်ဘက် မြေပြန့်လွင်ပြင်ဒေသများကို တိုက်ရိုက်တိုက်ခတ်လိမ့်မည်ဟု ဟူဆထားကြသည်။ စူပါတိုင်ဖွန်းနှင့်အတူ မိုးသည်းထန်စွာရွာသွန်းပြီး လေပြင်းများလည်းတိုက်ခတ်လိမ့်မည်ဟု ခန့်မှန်းထားရာ နှစ်ဆယ့်လေးနာရီအတွင်း မိုးရေချိန် မီလီမီတာ ၂၀၀( ၇ ဒသမ ၈၇ လက်မ) ကျော်ရွာသွန်းလိမ့်မည်ဟု ခန့်မှန်းထားရသည်။

ရေကြီးမှုများနှင့် မြေပြိုမှုများဖြစ်လာနိုင်သည့် ကျွန်း၏ တောင်ပိုင်းနှင့် အရှေ့ပိုင်းဒေသများသို့ ကယ်ဆယ်ရေးအတွက် စစ်သားများကို‌ ရာဘာလှေများနှင့်အတူ ပို့ထားကြောင်းလည်း သိရသည်။

Ref-inquirer.net