၂၅.၉. ၂၀၂၄
Written by Nay Moe
ကြို့ပင်ကောက်၊ ကြို့ပင်စခန်းအုပ်စုရာအိမ်မှူးကို PDF နှစ်ဖွဲ့ပေါင်းကာ နေအိမ်အထိဝင်ရောက်၍ ဦးခေါင်းကိုပစ်ခတ် သတ်ဖြတ်လိုက်သည်ဟု သတ်ဖြတ်သည့် PDF နှစ်ဖွဲ့က ယနေ့တွင် ပုံနှင့်တကွထုတ်ပြန်ထားသည်။
ပဲခူးတိုင်း၊ သာယာဝတီခရိုင်၊ ကြို့ပင်ကောက်မြို့နယ် ကြို့ပင်စခန်းအုပ်စု ရာအိမ်မှူး ဦးသိန်းဦးအား ၂၀၂၄ ခုနှစ် စက်တင်ဘာလ ၂၄ ရက် ညနေ ၄ နာရီအချိန်တွင် BTZM GBK PDF ပဲခူးရိုးမအခြေပြုတပ်ဖွဲ့နှင့် တပ်ရင်း ၃၈ဝ၂ ၊ တပ်ခွဲ (၁) Dragon Brothers နှစ်ဖွဲ့ပေါင်းကာ ဦးသိန်းဦးကို နေအိမ်တွင် ပစ်ခတ်သတ်ဖြတ်၍ လေသေနတ်တစ်လက်ကို တစ်ပါတည်း သိမ်းယူနိုင်ခဲ့သည်ဟု ထုတ်ပြန်ထားသည်။
ရာအိမ်မှူးဦးသိန်းဦးသည် ရပ်ရွာအတွင်း တပ်သားသစ်စုဆောင်းပေးခြင်း ၊ အဓမ္မ ငွေကြေးကောက်ခံခြင်းများ ကိုPDF နှင့် ဆက်စပ်သော သတင်းပေးမှုတို့ကြောင့် သတ်ဖြတ်သည်ဟုလည်း ကျူးလွန်သည့် PDF နှစ်ဖွဲ့က ဖော်ပြထားသည်။
ပဲခူးတိုင်းမှ PDF များသည် ရပ်ကျေးအုပ်ချုပ်ရေးမှူးများကို အဓိက သတ်ဖြတ်နေပြီး ယခုနှစ်အတွင်း ပဲခူးတိုင်းတစ်ခုတည်းတွင်ပင် အုပ်ချုပ်ရေးမှူး ရာဂဏန်းခန့် သတ်ဖြတ်ခံထားရသော်လည်း တရားခံ ဖမ်းမိမှုမရှိသလောက် နည်းပါးနေသည်။ နွေဦးတော်လှန်ရေး စတင်ချိန် ၂၀၂၁ ခုနှစ်၊ ဖေဖော်ဝါရီလ ၁ ရက်မှစတင်၍ ရဟန်း၊ သံဃာ၊ သီလရှင်၊ ဆရာ၊ ဆရာမနှင့် ကျောင်းသားကျောင်းသူများအပြင် အပြစ်မဲ့ပြည်သူများနှင့် နိုင်ငံ့ဝန်ထမ်း ၈၀၀၀ ခန့်ကို “ဒလန်၊ သူလျှို၊ နစကယန္တရားလည်ပတ်စေသူ” စွပ်စွဲချက်ဖြင့် NLD/CRPH/NUG/PDF/EAOs တို့က သတ်ဖြတ်ထားသလို ပညာရေး/ကျန်းမာရေးနှင့် လူနေအဆောက်အဦအပါအဝင် နိုင်ငံဖွံ့ဖြိုးတိုးတက်ရေးဆိုင်ရာ အခြေခံအဆောက်အဦ ၁၂၀၀၀ ခန့်ကိုလည်း တိုက်ခိုက်ဖျက်ဆီးထားကြောင်း သိရသည်။
