၂၄.၉.၂၀၂၄
Written By Thandar
ရုပ်ရှင်၊ ဂီတနယ်ပယ်က အနုပညာရှင်တွေနဲ့ ရန်ကုန်တိုင်းအမျိုးသမီး လက်ရွေးစင်အသင်းတို့က ရေဘေးသင့်ဒေသတွေ ပြန်လည်ထူထောင်ရေး ရန်ပုံငွေဘောလုံးပွဲကို ယနေ့ စက်တင်ဘာ ၂၄ ရက် ညနေပိုင်းက ရန်ကုန်မြို့ရှိ MFF FUTSAL STADIUM မှာ စတင်ကျင်းပခဲ့ပါတယ်။
“ကျွန်တော်တို့က ရေဘေးသင့်ဒေသတွေ ပြန်လည် ထူထောင်ရေး ရန်ပုံငွေဘောလုံးပွဲအတွက် အနုပညာရှင် ၃ သင်းနဲ့ ရန်ကုန်တိုင်းလက်ရွေးစင်ချန်ပီယံဖြစ်ထားတဲ့ ရန်ကုန်တိုင်းအမျိုးသမီး လက်ရွေးစင်အသင်းတို့ ၄ သင်းပတ်လည် ယှဉ်ပြိုင်ကစားကြမှာဖြစ်တယ်။ ရလာတဲ့ အလှူငွေတွေအကုန်လုံးကို ဒုတိယအဆင့်အနေနဲ့ ပြန်လည်ထူထောင်ရေးအတွက် လိုအပ်တဲ့နေရာတွေမှာ သွားရောက် လှူဒါန်းသွားမှာပါ။ ဒီပွဲမှာဆိုရင် ရုပ်ရှင်က ဘောလုံးဝါသနာပါတဲ့ ညီအစ်ကိုတွေလည်း ပါမယ်။ ဂီတက ဘောလုံးဝါသနာပါတဲ့ ညီအစ်ကိုတွေပါမယ်။ နောက်ပြီး Forever Group က ရုပ်သံဇာတ်လမ်းတွဲ သရုပ်ဆောင် ဝါသနာရှင် အနုပညာရှင် ညီအစ်ကိုတွေပါပြီး ယှဉ်ပြိုင်ကြတာပါ။ ဘောလုံးပွဲယှဉ်ပြိုင်နေတဲ့အချိန်မှာလည်း တခြား ရုပ်ရှင်နယ်ပယ်ထဲက သ ရုပ်ဆောင်တွေ၊ အဆိုတော်တွေက သီချင်းတွေလာဆိုပြီး ဖျော်ဖြေကြမှာဖြစ်ပါတယ်။ ပြိုင်ပွဲကာလက ၄ ရက် ဖြစ်တဲ့အတွက် အဆင်ပြေရင်ပြေသလို အားတဲ့အနုပညာရှင်မောင်နှမတွေက ဒီမှာလာရောက်ဖျော်ဖြေကြမှာပါ”လို့ သရုပ်ဆောင်မိုးယံဇွန် ကပြောပါတယ်။
အဆိုပါ ရန်ပုံငွေဘောလုံးပွဲအနေနဲ့ စက်တင်ဘာ ၂၄ ရက်မှာတော့ ရန်ကုန်တိုင်းအမျိုးသမီး လက်ရွေးစင်အသင်း YW FC နဲ့ Music FC တို့က မွန်းလွဲ ၃ နာရီမှာ တစ်ပွဲစတင်ကန်ခဲ့ရာ YW FC က ၄ ဂိုးရပြီး Music FC က ၆ ဂိုးနဲ့ အနိုင်ရရှိခဲ့ပါတယ်။
အဲ့ဒီနောက် ဒုတိယပွဲစဉ်အနေနဲ့ Movie FC နဲ့ Forever Group က သရုပ်ဆောင်တွေ ပါဝင်တဲ့ Friend FC တို့က ညနေ ၄ နာရီမှာ တစ်ပွဲအနေနဲ့ ဆက်လက်ပြိုင်ပွဲကန်ခဲ့ကြပါတယ်။
မနက်ဖြန် စက်တင်ဘာ ၂၅ ရက်မှာ YW FC နဲ့ Friend FC တို့က မွန်းလွဲ ၃ နာရီမှာ တစ်ပွဲ ၊ Movie FC နဲ့ Music FC တို့က ညနေ ၄ နာရီမှာ တစ်ပွဲ ၊ စက်တင်ဘာ ၂၆ ရက်မှာ Music FC နဲ့ Friend FC တို့က မွန်းလွဲ ၃ နာရီမှာ တစ်ပွဲ ၊ YW FC နဲ့ Movie FC တို့က ညနေ ၄ နာရီမှာ တစ်ပွဲ ပွဲစဥ်အသီးသီး ယှဉ်ပြိုင်သွားမှာဖြစ်တယ်လို့ သိရပါတယ်။လာမယ့် စက်တင်ဘာ ၂၇ ရက် မွန်းလွဲ ၃ နာရီမှာ တတိယနေရာလုပွဲကို အုပ်စုတတိယနဲ့ အုပ်စုစတုတ္ထတို့က ဆက်လက်ယှဉ်ပြိုင်ကြမှာဖြစ်ပြီးတော့ ညနေ ၅ နာရီမှာတော့ ဗိုလ်လုပွဲကို အုပ်စုပထမနဲ့ အုပ်စုဒုတိယအသင်းတို့က ယှဉ်ပြိုင်ဆော့ကစားသွားကြဖြစ်ပါတယ်။
