၂၃.၉.၂၀၂၄.
Translated by Htwe Ko Tun
ထိုင်းနိုင်ငံ၊ ဘန်ကောက်မြို့၊ ကန်ချနာဖီဆက်လမ်းပေါ်တွင် ၂၂ ဘီးပါ ထရပ်ကားတစ်စီးက အခြားယာဥ် ၁၆ စီးကို ဝင်တိုက်မိမှုတစ်ရပ်ဖြစ်ပွားခဲ့ပြီး လူ ၁၇ ဦးဒဏ်ရာရမှု စက်တင်ဘာလ ၂၂ ရက် ညနေပိုင်းက ဖြစ်ပွားခဲ့ကြောင်း သိရသည်။
အဆိုပါယာဥ်တိုက်မှုက ဘန်ကောက်မြို့၏ အပြင်မြို့ပတ်လမ်းဖြစ်သော ကန်ချနာဖီဆက်လမ်းပေါ် ကျောက်ဖယားမြစ်အနီးတွင် ညနေ ၅ နာရီခန့်က ဖြစ်ပွားခဲ့ကြောင်း ကယ်ဆယ်ရေးသမားများအား ကူညီပေးရန် ဆက်သွယ်သူက အကြောင်းကြားခဲ့သည်။
ဒဏ်ရာရသူများအား ဆေးရုံသို့ပို့ပေးနေမှုနှင့် ယာဥ်အပျက်အစီးများအား ဖယ်ရှားနေမှုတို့ကြောင့် ထိုလမ်းအစိတ်အပိုင်းအား တစ်နာရီခန့်ပိတ်ထားခဲ့ရပြီး ညနေ ၆ နာရီခွဲတွင် ပြန်လည်ဖွင့်လှစ်ပေးခဲ့သည်။
ယာဥ်တိုက်မှုတွင်ဝင်အတိုက်ခံရပြီး မော်တော်ကားထိခိုက်ပျက်စီးခဲ့သော အသက် ၅၁ နှစ်အရွယ် ပရာဆတ်ခက်ဘန်က ကြီးမားလှသော ၂၂ ဘီးကားက အရှိန်ဖြင့်ဝင်တိုက်ခဲ့ရာတွင် လူစီးကားများ၊ ပစ်ကပ်ကားများနှင့် ဓာတ်ငွေ့သယ်ကားကြီးတစ်စီးတို့ပါပျက်စီးခဲ့ရကြောင်း ပြောခဲ့ပြီး လက်ရှိတွင် ရဲတပ်ဖွဲ့က ယာဥ်တိုက်မှု၏အကြောင်းရင်းကို စုံစမ်းစစ်ဆေးလျက်ရှိကြောင်း သိရသည်။
Ref-Bangkok Post
