အိန္ဒိယနိုင်ငံမှ မုဒိမ်းကျင့်သတ်ဖြတ်ခံ အလုပ်သင်ဆရာဝန်အမျိုးသမီးငယ်အတွက် ဆန္ဒပြနေသည့် ဆရာဝန်များ လုပ်ငန်းခွင်ပြန်ဝင်ရန်တရားရုံးချုပ်က နောက်ဆုံးအချိန် သတ်မှတ်သော်လည်း ဆရာဝန်များက ဆက်လက်ဆန္ဒပြမည် ပြောကြား

၁၀. ၉. ၂၀၂၄
Translated by Htwe Ko Tun

အိန္ဒိယနိုင်ငံ၊ ကိုလ်ကတ္တားမြို့တွင် RG Kar ဆေးရုံမှ အလုပ်သင်ဆရာဝန် အမျိုးသမီးငယ်တစ်ဦး မတရားပြုကျင့်ခံရပြီး အသတ်ခံခဲ့ရမှုအတွက် ဆန္ဒပြနေကြသော ဆရာဝန်များအား ကောင်းကျိုးမပြုသော ဆောင်ရွက်မှုများမဖြစ်ပေါ်စေရန်အတွက်ဟုဆိုကာ စက်တင်ဘာလ ၁၀ ရက် ညနေ ၅ နာရီနောက်ဆုံးထား၍ မိမိတို့လုပ်ငန်းခွင်များသို့ ပြန်လည်ဝင်ရောက်ကြရန် တရားရုံးချုပ်က ညွှန်ကြားခဲ့သော်လည်း ဆန္ဒပြသူများက ၎င်းတို့၏လုပ်ဖော်ကိုင်ဘက်အတွက် တရားမျှတမှုကို တောင်းဆိုရန် လုပ်ငန်းခွင်ကို သပိတ်မှောက်၍ ဆက်လက်ဆန္ဒပြသွားမည်ဟု ပြောကြားခဲ့ကြသည်။

တရားရုံးချုပ်က ဆန္ဒပြနေသော ဆရာဝန်များအား ဤကဲ့သို အမိန့်ထုတ်လမ်းညွှန်ခဲ့ခြင်းက အလွန်ပင် စိတ်ပျက်အားလျော့ဖွယ်ဖြစ်ရကြောင်းလည်း အိန္ဒိယဆေးဘက်ဆိုင်ရာအဖွဲ့(IMA) ၏အနောက်ဘင်္ဂလား ပြည်နယ်အဖွဲ့ခွဲက စက်တင်ဘာလ ၉ ရက်တွင် ပြောခဲ့သည်။

အမျိုးသမီးဆရာဝန် ဩဂုတ်လ ၉ ရက်က မတရားပြုကျင့်အသတ်ခံရမှု တစ်လပြည့်သည့်နေ့ဖြစ်သော စက်တင်ဘာလ ၉ ရက်၌ ညကိုးနာရီအချိန်တွင် ကိုးမိနစ်ကြာ ဆန္ဒပြကြမှုကို ကိုလ်ကတ္တားမြို့၏နေရာအနှံ့ လမ်းများပေါ်၌ ဆန္ဒပြပြည်သူများက ‘၉-၉-၉’ ဆန္ဒပြပွဲဟု အမည်တပ်ကာ ပြုလုပ်ခဲ့ကြသေးသည်။ ရာပေါင်းများစွာသောပြည်သူများက ကိုးမိနစ်ကြာဆန္ဒပြမှုတွင် နိုင်ငံတော်သီချင်းကိုသီဆိုကြကာ ကိုလ်ကတ္တားမြို့အတွင်း လှည့်လည်ခဲ့ကြသည်။

ဆန္ဒပြဆရာဝန်များကလည်း ယခုအခါတွင် ပြည်နယ်ကျန်းမာရေးဝန်ကြီးနှင့် ကျန်းမာရေးပညာပေးရေးဌာန ညွှန်ကြားရေးမှူးတို့အား အလုပ်မှနုတ်ထွက်ပေးရန်တောင်းဆိုလာကြသည်။ ဆန္ဒပြဆရာဝန်တစ်ဦးက “ကျွန်တော်တို့ရဲ့တောင်းဆိုချက်တွေကိုလည်း ဖြည့်ဆည်းမပေးခဲ့ဘူး။ မတရားပြုကျင့်အသတ်ခံရသူ အတွက်လည်း မျှတတဲ့တရားစီရင်မှုမရသေးဘူး။ ဒီတော့ကျွန်တော်တို့ အနေနဲ့ အလုပ်ပြန်မဝင်နိုင်သေး ပါဘူး” ဟုပြောကြားခဲ့သည်။

Ref- Hindustan Times