၆.၉.၂၀၂၄
Written by KL
ရန်ကုန်-မန္တလေးအမြန်လမ်းမကြီး၊ မိုင်တိုင်အမှတ် ၃၃၆ တွင် စက်တင်ဘာ ၆ ရက် မွန်းလွဲ ၂ နာရီခွဲက ယာဥ်မောင်းအပါအဝင် လူ ၆ ဦးလိုက်ပါလာသော ဟိန်းစတား ခရီးသည်တင်ယာဥ်မှာ အရှိန်မထိန်းနိုင်ဘဲ လမ်းလယ်ကျွန်းတွင် ကာရံထားသော သံဘောင်တန်းကို ဝင်တိုက်ပြီး တိမ်းမှောက်ရာမှ ခရီးသည် ၃ ဦး ထိခိုက်ဒဏ်ရာရရှိခဲ့သည်။
Toyota Hiace အမျိုးအစား ဟိန်းစတား ခရီးသည်တင်ယာဥ်လိုင်းမှာ နေပြည်တော်ဘက်မှ မန္တလေးဘက်သို့ မောင်းနှင်လာစဥ် လမ်းခုလတ်၌ အရှိန်လွန်ကာ တိမ်းမှောက်ခဲ့ခြင်းဖြစ်ပြီး ယာဥ်ပေါ်လိုက်ပါလာသော အသက် ၆၅ နှစ်နှင့် အသက် ၆၆ နှစ်အရွယ် အဘွားအို ၂ ဦးနှင့် အသက် ၅၂ နှစ်အရွယ် အမျိုးသားကြီးတို့တွင် ဒဏ်ရာများရရှိခဲ့သဖြင့် တံတားဦးမြို့နယ်ပြည်သူ့ဆေးရုံ၌ ဆေးကုသမှုခံယူနေရကြောင်း အမြန်လမ်းမီးသတ်စခန်းထံမှ သိရသည်။
“ဒဏ်ရာရတဲ့သူက အသက်ကြီးတဲ့သူတွေပါ။ ခါးနာသွားတဲ့သူရယ်၊ ဘယ်ဘက်လက်ဖျံ ပေါက်ပြဲဒဏ်ရာရတဲ့သူရယ်၊ နှာခေါင်းသွေးထွက်ဒဏ်ရာရတဲ့သူတွေပါ။ အသက်အန္တရာယ်စိုးရိမ်စရာတော့မရှိပါဘူး “ဟု အမြန်လမ်းမီးသတ်စခန်းမှ မီးသတ်တပ်ဖွဲ့ဝင်တစ်ဦးကပြောသည်။
ယာဥ်တိမ်းမှောက်မှုကြောင့် ကားအရှေ့လေကာမှန်ကွဲအက်ကာ ကားဘယ်ဘက်အခြမ်း ပိန်ချိုင့်ခဲ့သဖြင့် အသက် ၂၉ နှစ်အရွယ် ယာဥ်မောင်းအမျိုးသားကို ပုဒ်မ ၃၃၇၊ ၂၇၉ဖြင့် စကားအင်း အမြန်လမ်းရဲစခန်းက အမှုဖွင့်ထားကြောင်း သိရသည်။
