သတ်ဖြတ်ခံရသူ ရရှိသော ဒဏ်ရာများ
MT News
Written by Min Mahar
ဒီဇင်ဘာလ ၂၅ ရက် ညဦးပိုင်းက ကျောက်ပန်းတောင်းမြို့နယ်တွင် အသက် ၆၆ နှစ်အရွယ် အမျိုးသားကြီးတစ်ဦး ၎င်း၏နေအိမ်ခြံဝန်းအတွင်း လမ်းလျှောက်နေစဉ် သေနတ်သမားများ၏ ပစ်ခတ်သတ်ဖြတ်ခံရကြောင်း ဒေသခံသတင်းရင်းမြစ်များထံက သိရသည်။
ဖြစ်စဉ်မှာ ဒီဇင်ဘာ ၂၅ ရက် ခရစ္စမတ်နေ့ ညဦးပိုင်း ၇ နာရီခန့်က မန္တလေးတိုင်းဒေသကြီး၊ ကျောက်ပန်းတောင်းမြို့နယ်၊ တလင်းကုန်းကျေးရွာအုပ်စု၊ ပန်းကြိုင်ကျေးရွာတွင် အသက် ၆၆ နှစ်အရွယ် ဦးမြသိန်းသည် ၎င်း၏နေအိမ်ခြံဝန်းအတွင်းလမ်းလျှောက်နေစဉ် အိမ်နောက်ဘက်လမ်းအတိုင်း တောင်မှမြောက်သို့ အမည်မသိ အသက် ၃၅ နှစ်ခန့်အမျိုးသား ၁ ဦးမှမောင်းနှင်ပြီး အမျိုးသမီး ၁ ဦး နောက်ထိုင်၍လိုက်ပါလာသော ဆိုင်ကယ်အနက်ရောင်ယာဉ် ၁ စီးခြံပေါက်ဝ၌ရပ်၍ ဆိုင်ကယ်မောင်းနင်သူ အမျိုးသားမှ ပစ္စတိုသေနတ်ဖြင့် ၅ ချက်ပစ်ခတ်ခဲ့ပြီး မြောက်ဘက်သို့ မောင်းနှင်ထွက်ပြေးသွားခဲ့ကြောင်း အသတ်ခံရသူ၏ မိသားစုဝင်များထံမှ သိရသည်။
သေနတ်ဖြင့်ပစ်ခတ်ခံရမှုကြောင့် ဦးမြသိန်းမှာ ဦးခေါင်းထိပ် ကျည်ဖောက်ဝင်ဒဏ်ရာ ၁ ချက်၊ ဝဲဘက်လယ်ကုတ်ကျည်ဖောက်ဝင်ဒဏ်ရာ ၁ ချက်၊ ဝဲဘက်ရင်အုံ ကျည်ဖောက်ဝင်ဒဏ်ရာ ၂ ချက်၊ ဝဲဘက်လက်မောင်းရင်း ကျည်ဖောက်ဝင်ဒဏ်ရာ ၁ ချက်တို့ဖြင့် နေရာတွင်ပွဲချင်းပြီး သေဆုံးသွားခဲ့ရသည်။