၂၈. ၈. ၂၀၂၄
Written by Thettant
ပဲခူးမြို့နယ်၊ ဘုရားကြီးမြို့အနီးက ဝင်္ဂဘော် ECBT ဆင်စခန်းမှာရှိတဲ့ အသက် ၂၁ နှစ်အရွယ် ဆင်မကလေး ပုလဲစန္ဒာရဲ့ ပထမဆုံးအကြိမ်မွေးဖွားခြင်းအနေနဲ့ ဩဂုတ် ၂၈ ရက် တနင်္လာနေ့မှာ ဆင်အမြွှာကလေး၂ ကောင် မွေးဖွားခဲ့တယ်လို့ သိရပါတယ်။
ဆင်အမြွှာမွေးဖွားမှုဟာ နံနက် ၃ နာရီ ၃၈ မိနစ်အချိန်မှာ ဆင်မကလေး(အကြီး) ပုလဲဆင့်နဲ့ နံနက် ၃ နာရီ ၄၂ မိနစ်အချိန်မှာ ဆင်ထီးကလေး(အငယ်) ကျော်ပုလဲ တို့ကို မွေးဖွားခဲ့တာ ဖြစ်ပါတယ်။
အမြွှာ ဆင်ကလေး မောင်နှမဟာ အရပ်အနည်းငယ်နိမ့်ပြီးနို့မမှီလို့ နို့စို့နိုင်ဖို့ ခုံလေးပြုလုပ်ပေးထားရသလို မိခင်ဆင်မကြီးရဲ့ နို့တစ်မျိုးတည်းနဲ့ အမြွှာဆင် မောင်နှမ နို့မဝနိုင်လို့ Dumex step 2 ကိုဖျော်ပြီး နို့ဗူးနဲ့ပါ တိုက်ကျွေးပြုစုနေရသလို မိခင် ဆင်မကြီးကိုလည်း အာဟာရပြည့်ဝပြီး နို့ထွက်ကောင်းစေဖို့ ဖြည့်စွက်စာ စပါးကို ကျွေးပေးနေရတယ်လို့ သိရပါတယ်။
ဆင်မတွေ သားဖွားတဲ့အခါမှာ အမြွှာပူးမွေးဖွားတယ်ဆိုခြင်းက အလွန်ရှားပါးပြီး တွေ့ရခဲတယ်လို့ဆိုရမှာ ဖြစ်သလို ၁ ရာခိုင်နှုန်းအောက်သာ မွေးဖွားပြီး အမြွှာပူးမွေးရင်လည်း အသက်မရှင်တာ မိခင်ဆင်မသေဆုံးတာ ဖြစ်တတ်ပါတယ်။ လတ်တလောမှာလည်း ဆင်အမြွှာမွေးဖွားမှုအဖြစ် ပြီးခဲ့တဲ့ ဇွန်လ ၇ ရက်ညနေက ထိုင်းနိုင်ငံမှာ အသက် ၃၆ နှစ်ရှိ ဂျမ်ဂျူရီ အမည်ရှိတဲ့ အာရှဆင်မတစ်ကောင်ကတော့ ထူးထူးခြားခြားဆင်သားပေါက်နှစ်ကောင်ကို အမြွှာမွေးဖွားခဲ့တယ်လို့သိရပြီး ပထမဆုံးဆင်ထီးလေးကို မိခင်ဆင်မက လက်ခံပေမဲ့ ဒုတိယမွေးတဲ့ဆင်မလေးကိုတော့ မိခင်ဆင်မက လက်မခံဘဲ ရန်ပြုမှုရှိလို့ ခွဲထားရမှုရှိပါတယ်။
ဒါပေမဲ့လည်း မြန်မာနိုင်ငံက ဝင်္ဂဘော်ဆင်စခန်းမှာ မွေးဖွားတဲ့ ဆင်အမြွှာလေးမောင်နှမကိုတော့ မိခင်ဆင်မကြီးက ရန်မပြုသလို ထူးခြားပြီးချစ်စရာကောင်းတဲ့ ဆင်အမြွှာလေးမောင်နှမ လာကြည့်ရင်း ဆင်စခန်းမှာ လာရောက်အပန်းဖြေဖို့လည်း ဝင်္ဂဘော် ဆင်စခန်းမိသားစုက ဖိတ်ခေါ်ထားပါတယ်။
