စိုက်ပျိုး၊ မွေးမြူရေးလုပ်ငန်းဖြင့် ကိုရီးယာဘာသာ အရည်အချင်းစစ်စာမေးပွဲ အောင်မြင်ထားပြီး လျှောက်လွှာသက်တမ်းကျန်ရှိသူများ သစ်တောလုပ်ငန်းသို့ ပြောင်းရွှေ့လျှောက်ထားနိုင်

၂၆. ၈. ၂၀၂၄
Written by Nyein Kyaw

၂ဝ၂၂ ခုနှစ်၊ ကိုရီးယားဘာသာ အရည်အချင်းစစ်စာမေးပွဲ (စိုက်ပျိုးရေးနှင့် မွေးမြူရေးလုပ်ငန်း) အောင်မြင်၍ အလုပ်လျှောက်လွှာတန်းစီဇယား သက်တမ်းကျန်ရှိပြီး အလုပ်ရှင်နှင့် မိတ်ဆက်မခံရသေးသူများသည် စိုက်ပျိုးရေးနှင့် မွေးမြူရေးလုပ်ငန်းမှ သစ်တောလုပ်ငန်း (Forestry)သို့ လုပ်ငန်းပြောင်းရွှေ့ လုပ်ကိုင်နိုင်ကြောင်း POEA-EPS မှ အသိပေးထုတ်ပြန်ထားသည်။

အလုပ်လျှောက်လွှာ တန်းစီဇယားသက်တမ်းသည် လက်ရှိစိုက်ပျိုးရေးနှင့် မွေးမြူရေးလုပ်ငန်း သက်တမ်းကုန်ဆုံးမည့်ရက်အထိဖြစ်ကြောင်း၊ လုပ်ငန်းပြောင်းရွှေ့လျှောက်ထားလိုသူများသည် ၂၀၂၄ ခုနှစ် ဩဂုတ်လ ၂၇ ရက် နံနက် ၉ နာရီမှ နေ့လယ် ၃ နာရီအတွင်း POEA ရုံးသို့ နိုင်ငံကူးလက်မှတ် (မူရင်းနှင့်မိတ္တူ)၊ စာမေးပွဲဖြေဆိုခွင့် အမှတ်စဉ်တင်ပြကာ ကာယကံရှင်ကိုယ်တိုင် လာရောက်လျှောက်ထားရမည်ဖြစ်သည်။

စိုက်ပျိုးရေးနှင့် မွေးမြူရေးလုပ်ငန်းမှ သစ်တောလုပ်ငန်းသို့ ပြောင်းရွှေ့ခြင်းသည် အလုပ်အကိုင်ရရှိမည်ဟု အာမမခံကြောင်းနှင့် EPS စနစ်အရ အလုပ်ရှင်စိတ်ကြိုက် ရွေးချယ်ခြင်းသာဖြစ်ကြောင်း အသိပေးထားပြီး သစ်တောလုပ်ငန်းအတွက် တန်းစီဇယားလုံလောက်ပါက မူလလုပ်ငန်းဖြစ်သည့် စိုက်ပျိုးရေးနှင့် မွေးမြူရေးလုပ်ငန်းသို့ ပြန်လည်ပြောင်းရွှေ့ခွင့်ပြုကြောင်း အသိပေးကြေညာထားသည်။

လက်ရှိတွင် HRD-Korea မှ ပေးပို့လာသည့် စိုက်ပျိုးရေးနှင့် မွေးမြူရေးလုပ်ငန်းမှ သစ်တောလုပ်ငန်းသို့ ပြောင်းရွှေ့လုပ်ကိုင်ရှိသူ ၁၃၆၆ ဦး၏ အမည်စာရင်းနှင့် စာမေးပွဲဖြေဆိုခွင့်အမှတ်စဉ်များကိုပါ ပူးတွဲကြေညာပေးထားသည်။