၁၉.၈.၂၀၂၄
Written by Hey Mar
သက်ကြီးအဘွားအိုတစ်ဦးတည်း အိမ်မှာရှိနေစဉ် လုယက်ခံရမှု မနေ့က ဩဂုတ်လ ၁၈ ရက် ညဦးပိုင်း ၈ နာရီဝန်းကျင်က ရန်ကုန်တိုင်းဒေသကြီး တာမွေမြို့နယ်မှာ ဖြစ်ပွားခဲ့တယ်လို့ သိရပါတယ်။
ဖြစ်စဉ်က တာမွေမြို့နယ်၊ တာမွေကြီး(ခ)ရပ်ကွက်၊ ၁၆၆ လမ်းရှိ နေအိမ်တိုက်ခန်းမှာ ဖြစ်ပွားခဲ့တာလို့ သိရပါတယ်။ အသက်ကြီးအဘွားအိုတစ်ဦးတည်း နေအိမ်လေးလွှာမှာရှိနေစဥ် အမျိုးသားနှစ်ဦးက အဘွားကို ထိုးကြိတ်၊ လည်ပင်းညှစ်၊ မျက်နှာကို ခေါင်းဦးနဲ့ ဖိတာတွေ ပြုလုပ်လုယက်နေချိန် တစ်တိုက်တည်းနေ ရှစ်လွှာမှ သမီးဖြစ်သူက မိခင်ဖြစ်သူဆီဆင်းလာရာ တံခါးဖွင့်မရတာကြောင့် တိုက်ခန်းနေသူနေသူတွေကို အကူအညီတောင်းလို့ လုယက်သူနှစ်ဦးက ဘေးပြတင်းပေါက်က ခုန်ချထွက်ပြေးသွားပေမဲ့ ပတ်ဝန်းကျင်ပြည်သူတွေက လိုက်လံဖမ်းဆီးလို့ လုယက်သူတစ်ဦးကို ဖမ်းမိခဲ့ပြီး သက်ဆိုင်ရာတာဝန်ရှိသူတွေဆီ အပ်နှံကြလိုက်ကြတယ်လို့ သိရပါတယ်။ တစ်ဦးက လွတ်မြောက်သွားပြီး လွတ်သူနဲ့အတူ ရွှေနဲ့ ငွေသားတချို့ ပါသွားတယ်လို့လည်း ဖြစ်စဥ်ကို ရပ်ကွက်အတွင်းနေထိုင်သူတချို့ထံကနေ သိရှိရပါတယ်။
လုယက်ထိုးကြိတ်ခံရသူ လူနာအဘွားကို YGH ဆေးရုံအရေးပေါ်ဌာနဆီ မြန်မာမွတ်စလင် ပရဟိတအသင်းက ကူညီပို့ဆောင်ပေးခဲ့တယ်လို့ သိရပါတယ်။
