၁၂.၈.၂၀၂၄
Written by KL
ရန်ကုန်တိုင်းဒေသကြီး၊ ဒဂုံမြို့သစ် (ဆိပ်ကမ်း)မြို့နယ်၊ အမှတ် (၆၀) ရပ်ကွက်၊ ဧရာဝဏ်လမ်းတွင် ယနေ့ သြဂုတ်လ ၁၂ ရက် နံနက်အစောပိုင်းက ဂတ်စ်တန်းစီရန် ရပ်ထားသော YBS -၁၄၄ ကို မော်တော်ယာဥ်တစ်စီးက ဝင်တိုက်ရာမှ တိုက်သည့် ယာဥ်မောင်းအမျိုးသားတစ်ဦး သေဆုံးခဲ့ကြောင်း ကယ်ဆယ်ရေးလုပ်ဆောင်သူများထံမှ သိရသည်။
ဖြစ်စဥ်တွင် အသက် ၅၅ နှစ်အရွယ် အမျိုးသားမောင်းနှင်လာသော Subaru Sambar အမျိုးအစား မော်တော်ယာဥ်က အရှိန်မထိန်းနိုင်ဘဲ ဂတ်စ်တန်းစီရန် လမ်းဘေးတွင် ရပ်ထားသော YBS- ၁၄၄ ယာဥ်ကို အနောက်မှ ဝင်တိုက်သဖြင့် Subaru Sambar အမျိုးအစား မော်တော်ယာဥ်၏ ယာဥ်မောင်းမှာ ကားခေါင်းခန်းတွင်ညပ်ကာ သေဆုံးခဲ့ခြင်းဖြစ်သည်။
“ကားက ခေါင်းတစ်ခုလုံးကြေသွားပြီး ယာဥ်မောင်းကလည်း ပြင်းပြင်းထန်ထန် ဒဏ်ရာရပြီး ဆုံးသွားတယ်။ ခေါင်းခန်းမှာ ညပ်နေတဲ့ယာဥ်မောင်းကို ကယ်ထုတ်တာ မိနစ် ၃၀ လောက်ကြာတယ်”ဟု ကယ်ဆယ်ရေးဆောင်ရွက်သူတစ်ဦးက ပြောသည်။
အဆိုပါ ယာဥ်တိုက်မှုဖြစ်စဥ်ကို ဒဂုံမြို့သစ်(ဆိပ်ကမ်း) မြို့နယ် မီးသတ်စခန်းမှ ကယ်ဆယ်ရေးအဖွဲ့ဝင်များက သွားရောက်ကာ ကယ်ဆယ်ရေးလုပ်ငန်းများလုပ်ဆောင်ခဲ့ကြပြီး သေဆုံးသူ ယာဥ်မောင်း၏ ရုပ်အလောင်းကို အကြင်နာကုသိုလ်ပြု ဘဘကြီးအဖွဲ့ ပရဟိတအသင်းက အသင်းပိုင်သူနာတင်ယာဉ်ဖြင့် မြောက်ဥက္ကလာပမြို့နယ်၊ မေဓာဝီဆေးရုံသို့ပို့ဆောင်ပေးခဲ့ကြောင်း သိရသည်။
