◾ သတ်ဖြတ်ခံရသူများမှာ သားအမိသားအဖ သုံးယောက်ဖြစ်ပြီး သတ်ဖြတ်သူများက မော်တော်ယာဥ် လုယက် ယူဆောင်သွား
၁၁.၈.၂၀၂၄
Written by TZ
နေပြည်တော်ကောင်စီနယ်မြေ၊ ဥတ္တရသီရိမြို့နယ်၊ ဇဝနသိဒ္ဓိရပ်ကွက်၊ မြတ်လေးလမ်းရှိ နေအိမ်တိုက်ထဲတွင်သတ်ဖြတ်ခံရသည့် မိသားစု ( ၃) ယောက်၏ ပုပ်ပွနေသည့် အလောင်းများတွေ့ရှိခဲ့ကြောင်းနှင့် သတ်ဖြတ်သူများက မော်တော်ယာဥ်အား လုယက် ယူဆောင်သွားကြောင်း သိရသည်။
သတ်ဖြတ်ခံရသည့် ရုပ်အလောင်းများမှာ ပြီးခဲ့သည့် သြဂုတ်လ ၈ ရက်နေ့က သတ်ဖြတ်ခံရသည်ဟုဆိုပြီး ထိုရုပ်အလောင်းများကို သြဂုတ်လ ၁၀ ရက်နေ့တွင် တွေ့ရှိကာ သက်ဆိုင်ရာမှ သဗ္ဗသုခနာရေးကူညီမှုအသင်းသို့ ဖုန်းဆက်လာ၍ အသင်းက ရုပ်အလောင်းများကို ဇမ္ဗူသီရိမြို့နယ်ရှိ ကုတင် (၁၀၀၀) ဆေးရုံရှိ ရေခဲတိုက် ( ရင်ခွဲရုံ) သို့ ကူညီပို့ဆောင်လိုက်ကြောင်း သိရသည်။
“မိသားစု ၃ ယောက် အသတ်ခံရတာ။ လင်မယားနှစ်ယောက်နဲ့သား အသတ်ခံရတာ။ အလောင်းတွေက ပုပ်နေပြီ။ ဓားဒဏ်ရာတွေနဲ့။ သတ်တဲ့သူက လူရင်းတွေထဲကဖြစ်မယ်။ ခြံစည်းရိုးတံခါးလည်း ပွင့်နေတယ်။ ကားလည်းယူဆောင်သွားတယ်” ဟု ဖြစ်စဥ်သိရှိသည့် ဥတ္တရသီရိမြို့နယ်တွင် နေထိုင်သူတစ်ဦးက MT News သို့ ပြောသည်။
သတ်ဖြတ်ခံရသည့် အမျိုးသားနှင့်အမျိုးသမီးမှာ အသက် (၅၀) ကျော်အရွယ်ရှိပြီး သားဖြစ်သူမှာ အသက် (၂၀) ကျော်သာ ရှိသေးကြောင်းလည်း သိရသည်။
ဓာတ်ပုံ- သဗ္ဗသုခနာရေးကူညီမှုအသင်း
