၂၄. ၆. ၂၀၂၄
Written by Thettant
မန္တလေးမြို့၊ မဟာအောင်မြေမြို့နယ်၊ ၃၈ လမ်း၊ ၅၂ လမ်း ၅၃ လမ်းကြားရှိ ICON KTV တွင် ယနေ့နံနက်ပိုင်းက မီးလောင်မှုဖြစ်ပွားခဲ့ကြောင်း သိရသည်။
မီးလောင်မှုဖြစ်စဥ်မှာ ယနေ့ ဇွန်လ ၂၄ ရက် နံနက် ၉ နာရီဝန်းကျင်က မီးစတင်လောင်ကျွမ်းခဲ့ခြင်းဖြစ်ပြီး မန္တလေးမြို့ရှိ နယ်မြေခံ မီးသတ်တပ်ဖွဲ့ဝင်များက ကူညီ မီးငြှိမ်းသတ်ခဲ့ရာ မိနစ်ပိုင်းအကြာတွင် မီးငြိမ်းသွားကြောင်း ကနဦး သိရသည်။
“လောင်တာက မကြာလိုက်ပါဘူး။ လောင်သွားတာကလည်း တစ်ခန်းတည်းပါ။ ဘာကြောင့်ဖြစ်တယ်ဆိုတာကိုတော့ စုံစမ်းစစ်ဆေးနေတုန်းပါ”ဟု ကူညီငြှိမ်းသတ်သည့် နယ်မြေခံမီးသတ်တပ်ဖွဲ့ဝင်တစ်ဦးက ကနဦးသိရသည်ကို MT News သို့ပြောသည်။
အဆိုပါ မီးလောင်မှုကြောင့် လူထိခိုက်မှုမရှိကြောင်း၊ အခန်းတစ်ခန်းသာမီးလောင်ခဲ့ပြီး ပျက်စီးထိခိုက်မှုတန်ဖိုး စိစစ်တွက်ချက်ဆဲသာဖြစ်ကြောင်း သိရသည်။
ပုံစာ။ မီးလောင်မှု ငြှိမ်းသတ်နေသော မြင်ကွင်း( Photo – Than Htay)
