၂၂.၆.၂၀၂၄
Written by TZ
ရန်ကုန်တိုင်းဒေသကြီး၊ မင်္ဂလာဒုံခရိုင်၊ ရွှေပြည်သာမြို့နယ်၊ အမှတ်(၄) လမ်းမကြီးပေါ်ရှိ Remix Beer Pub ဆိုင် ဒုတိယမြောက်အထပ်တွင် ဝါယာကြိုးရှော့ခ်ဖြစ်ရာမှ မီးလောင်မှုဖြစ်ပွားခဲ့ကြောင်း သိရသည်။
အဆိုပါဖြစ်စဥ်မှာ ယနေ့ ဇွန်လ ၂၂ ရက် နံနက်ပိုင်းက ဖြစ်ပွားခဲ့ခြင်းဖြစ်ပြီး နံနက် ၅ နာရီ ၃၈ မိနစ်အချိန်တွင် အဆိုပါဖြစ်စဥ်နေရာ၌ မီးလောင်မှုဖြစ်ပွားကြောင်း သတင်းရရှိသောကြောင့် ရွှေပြည်သာမြို့နယ်မီးသတ်စခန်းမှ မီးငြှိမ်းသတ်ယာဥ် (၃) စီးဖြင့် မီးငြှိမ်းသတ်ရာ နံနက် ၅ နာရီ ၄၂ မိနစ်အချိန်တွင် မီးထိန်းနိုင်ခဲ့ပြီး ၆ နာရီ ၅ မိနစ်အချိန်တွင် မီးငြိမ်းသွားကြောင်း သိရသည်။
“သုံးထပ်ရှိတာ အခုလောင်တာ နှစ်ထပ်မြောက်ပေါ့။ အရင်ကတော့ Bar ပါ။ အခုတော့ လက်ဖက်ရည်ဆိုင်ပါ။ လက်ဖက် ရည်ဆိုင်ဖွင့်ထားတာ မကြာသေးဘူး။ အခုလောင်တဲ့နေရာက ဟောခန်းပုံစံမျိုးပါပဲ။ ခုံတွေ့တော့ရှိတယ်။ ဝါယာရှော့ခ်ပဲဆိုတော့ မီးကြိုးကပဲနေမယ်။ လူထိခိုက်မှုမရှိဘူး”ဟုမီးသတ်တပ်ဖွဲ့ဝင်တစ်ဦးက MT News သို့ ပြောသည်။
အလားတူ ဇွန်လ ၂၂ ရက် နံနက် ၇ နာရီ ၄၆ မိနစ် အချိန်ကလည်း ရန်ကုန်တိုင်းဒေသကြီး၊ တာမွေမြို့နယ်၊ မအူကုန်းရပ်ကွက်၊ ၁၃၈ လမ်းရှိ တိုက်ခန်းတစ်ခန်းမီးလောင်မှုဖြစ်ပွားခဲ့သောကြောင့် တာမွေမြို့နယ်မီးသတ်စခန်းက မီးငြှိမ်းသတ်ခဲ့ရကြောင်း သိရသည်။
Photo – Hein Lay
