၂၃ – ၁၂- ၂၀၂၂
Written By Naddy
မောင်လေးစား သီချင်းနဲ့ ပရိသတ်အားပေးမူကို အခိုင်အမာရရှိထားတဲ့ တေးသံရှင် လှယမင်းအိမ်ကတော့ ဒီနေ့ ဒီဇင်ဘာ ၂၃ ရက် ညနေ ၆ နာရီမှာတော့ “Over” သီချင်းထွက်ရှိမှာဖြစ်တဲ့အတွက် စိတ်လှုပ်ရှားပြီး ရင်ခုန်နေတယ်လို့ ဆိုပါတယ်။
“ကိတ်က ကိုသားနဲ့ ဒီသီချင်းက လုပ်ထားတာ ၁နှစ်လောက်ရှိပြီ။ အရင် Crush တစ်ပုဒ် ထွက်ထားတော့ ဒီသီချင်းကို အခုမှ ထုတ်ဖြစ်သွားတာပါ။ ကိုသားနဲ့ ကိတ် တို့က သီချင်း Crush ရယ် အခုသီချင်း Over ရယ် ၂ပုဒ်ရယ် ရှိပြီပေါ့နော်။ ကိုယ့်သီချင်းလေး ညနေထွက်တော့မှာမို့ စိတ်လှုပ်ရှားပြီးတော့ ရင်ခုန်ပါတယ်။ မနေ့က ဒီသီချင်းအမြည်းလေး တင်ထားတာကို ပရိသတ်တွေက ကိုသားရဲ့ Post တွေ အောက်မှာလည်း ကိုသားစား၊ ကိုသား အားရပါးရစားဆိုပြီး Comment တွေနဲ့ ကိုသားကို နောက်နေကြတယ်ပေါ့နော်။ ရယ်နေရတယ်။ Comment တွေ ကြည့်ပြီး။ အခုလို ကိုသားနဲ့ ညီမ ဒီ Over သီချင်းလေးကို ချစ်ပေး အားပေးကြလို့ အရမ်းဝမ်းသာပါတယ်”လို့ တေးသံရှင်လှယမင်းအိမ်က ပြောပါတယ်။
သူမသီဆိုမဲ့ “Over” သီချင်းကိုတော့ တေးရေး တေးဆို သားသားနဲ့အတူ Pop Music ခပ်ဆန်းဆန်းလေး သီဆို ထားကြတာပါ။ ဒီသီချင်း Music Video ကို ဒါရိုက်တာ JCZ က ရိုက်ကူးထားပြီးတော့ Music & Mastering ပိုင်းကိုတော့ သားသားကပဲ တီးခတ်ပေးထားပါတယ်။
“ကိုသားက ကိတ်ကို အမြဲ ကူညီတယ်။ စောင့်ရှောက်တယ်။ ကိုယ့် ဂီတပိုင်းနဲ့လုပ်ချင်တာ မှန်သမျှ အကုန် လုပ်ပေးတယ်။ ကိုသားက ညီမအတွက် အရမ်းလေးစားပြီး ချစ်ရတဲ့ ထာဝရ ချစ်ကိုကြီးပါပဲ။ အခုလည်း ညီမ ဒီ သီချင်းထုတ်တော့မယ်ပြောလည်း ချက်ချင်း အကုန် သေချာလုပ်ပေးတယ်။ ကိုသားကို ကျေးဇူးအများကြီးတင်ပါတယ်”လို့ သူမက ဆက်လက်ပြောပါတယ်။
လှယမင်းအိမ်ကတော့ ၂၀၂၂ ခုနှစ်ထဲမှာ ဂီတပိုင်းနဲ့ပတ်သက်ပြီးတော့ Oasix နဲ့ Zoot သီချင်း၊ သားသားနဲ့ Crush သီချင်း၊ ထက်ယံနဲ့ Fake သီချင်း၊ ဟိန်းမင်းသူနဲ့ A Beautiful Mistake သီချင်း ၊ ဆွဲ သီချင်း၊ အူရီဒူရီ သီချင်း စတာတွေကို ထွက်ရှိထားသူလည်း ဖြစ်ပါတယ်။
“ကိတ် အစကတော့ ကို X Box နဲ့ သီချင်းကို အရင် ထုတ်မလို့ပါဘဲ။ ကို X Box ကလည်း အခု Christmas, New Year နိုင်ငံခြားခရီးစဉ် မိသားစုနဲ့ ထွက်ဖြစ်သွားလို့ သူပြန်လာလို့ New Year ပြီးမှပဲ ထုတ်လိုက်ဖို့ ကိတ်တို့ စဉ်းစားထားပါတယ်။ အဲဒါကြောင့် ကိုသားနဲ့ သီချင်း အရင်ထုတ်ဖြစ်သွားတာပါ”လို့ ဆိုပါတယ်။
