၁၆.၆.၂၀၂၄
Written By Thandar
Mahar Original Series က ရိုက်ကူးတင်ဆက်ထားတဲ့ မိသားစု ဒရာမာဇာတ်လမ်းပုံစံ ” အမွှေ” ရုပ်သံဇာတ်လမ်းတွဲ စာနယ်ဇင်းမိတ်ဆက်ပွဲကို ယနေ့ ဇွန်လ ၁၆ ရက် နံနက်ပိုင်းက ရန်ကုန်မြို့ Melia’ Hotel မှာ ကျင်းပခဲ့ပါတယ်။
“ဒီအမွှေ ဇာတ်ကားမှာ ရဲရင့်နေရာက ပါဝင်ထားပါတယ်။ ကျွန်တော့်အနေနဲ့ မတူညီတဲ့ ကာရိုက်တွေလုပ်ကြည့်ချင်တယ်။ ပထမတစ်ကားတုန်းကလည်း မဟာက အရက်သမားကာရိုက်တာနဲ့ ရိုက်ကူးခွင့်ပေးခဲ့တယ်။ ဒီကားထဲမှာလည်း ကိုယ့်အတွက်ကာရိုက်တာကို အများကြီးပြောင်းလဲစေခဲ့တယ်။ ဆေးသမားပါဖြစ်ခွင့်ရသွားလို့ ကျေနပ်မှုလည်းရခဲ့ပါတယ်” လို့ သရုပ်ဆောင် ထွန်းကိုကိုက ပြောပါတယ်။
အဆိုပါ ဇာတ်လမ်းတွဲကို ဇာတ်လမ်း ကျူးလစ်မေ ၊ ဇာတ်ညွှန်းအေးသီရိကိုက ရေးသားပြီးတော့ ဒါရိုက်တာ သားကြီးက သရုပ်ဆောင်တွေဖြစ်တဲ့ ထွန်းကိုကို ၊ ရဲရင့်သော် ၊ အုပ်စိုးခန့် ၊ ရွှေသမီး ၊ မေလသံစဉ် ၊ ချိုပြုံး ၊ ခင်ဇာခြည်ကျော် ၊ မင်းအာကာ ၊ နေဆန်း ၊ ဇော်ဝင်းမောင် ၊ သတ္တိ ၊ ထူးမွန် ၊ တင်ဇာဝင်းပြည့် ၊ အေဏီဇော် ၊ စင်သီယာ ၊ ဇာခြည်လွင် စတဲ့အနုပညာရှင်များစွာနဲ့ ရိုက်ကူးထားကြပါတယ်။
“မေလ ဒီဇာတ်လမ်းတွဲမှာ သံစဉ်ဆိုတဲ့ ကာရိုက်တာနဲ့ ပါဝင်သရုပ်ဆောင်ထားပါတယ်။ အမွှေမှာတော့ မိသားစုလိုက် မောင်နှမတွေချစ်ခြင်းတွေ ပြဿနာတွေဖြစ်ကြတယ်။ မေလရဲ့အကိုအနေနဲ့ အုပ်စိုးခန့်က ပါဝင်ထားတယ်။ ကိုယ့် မိသားစုလေးရဲ့ မထင်မှတ်ထားတဲ့ ပြဿနာတွေကို အကောင်းဆုံး ကြိုးစားပုံဖော်ထားကြပါတယ်” လို့ အဆိုတော်သရုပ်ဆောင်မေလသံစဉ်က ပြောပါတယ်။
အပိုင်း(၃၀) ပါဝင်တဲ့ “အမွှေ “ဇာတ်လမ်းတွဲကြီးကို ဇွန်လ ၁၅ ရက်နေ့က စတင်ပြီး Mahar Application က ညစဥ် ၇ နာရီမှာ ထုတ်လွှင့်ပြသနေပြီဖြစ်ပါတယ်။
