၁၄.၆.၂၀၂၄
Written by TZ
နေပြည်တော်ကောင်စီ၊ ဇေယျာသီရိမြို့နယ်၊ ရန်ကုန်-မန္တလေးလမ်းဟောင်း၊ အင်ပင်းခုံကျေးရွာအနီးရှိ လမ်းဘေးခြုံဘေးတွင် စိတ်မနှံ့သည့် အမျိုးသမီးတစ်ဦး အာဟာရပြတ်၍ လမ်းဘေးလဲနေသဖြင့် ကူညီကယ်ဆယ်ပေးခဲ့သည်ဟု ကရုဏာရှင်လူမှုကူညီရေးပရဟိတအသင်းမှ သိရသည်။
ဖြစ်စဥ်မှာ ယနေ့ ဇွန်လ ၁၄ ရက် နံနက် ၇ နာရီဝန်းကျင်တွင် အမျိုးသမီးတစ်ဦး လဲကျနေကြောင်း ကရုဏာရှင်လူမှုကူညီရေးပရဟိတအသင်းသို့ ကျေးရွာရှိပြည်သူများမှ ဖုန်းဆက်အကြောင်းကြားသောကြောင့် ဖြစ်စဥ်နေရာသို့ သွားရောက်ပြီး ထိုအမျိုးသမီးကို နေပြည်တော်ပြည်သူ့ဆေးရုံကုတင် (၃၀၀) သို့ ပို့ဆောင်ကာ ဆေးကုသမှုခံယူစေခဲ့ကြောင်း သိရသည်။
“စိတ်မနှံ့တဲ့အမျိုးသမီး။ အာဟာရပြတ်နေတာ။ သူကမိသားစုလည်းမရှိတော့ အခုဆေးရုံမှာ ရဲတွေကစောင့်ပေးနေတယ်” ဟု ကရုဏာရှင်လူမှုကူညီရေးပရဟိတအသင်းမှ တာဝန်ရှိသူတစ်ဦးက MT News သို့ ပြောသည်။
အဆိုပါ စိတ်မနှံ့သည့် အမျိုးသမီးမှာ အသက် (၄၀) ဝန်းကျင်ရှိကြောင်း သိရသည်။
